काठमाडौं । प्रतिनिधिसभा बैठकमा राष्ट्रिय स्वतन्त्र पार्टी (रास्वपा) ले लगातार अवरोध जारी राखेको छ । भिजिट भिसा प्रकरणमा गृहमन्त्री रमेश लेखकको राजीनामा माग्दै रास्वपाले संसद् अवरुद्ध गर्दै आएको छ ।
सोमबारको बैठकमा पनि रास्वपाका सांसदहरूले रोस्ट्रमअघि उभिएर नाराबाजी र अवरोध गरेका छन् । रास्वपाले सरकारद्वारा गठित भिजिट भिसा प्रकरण छानबिन समितिलाई अस्वीकार गरेको छ ।
उक्त समितिको निष्पक्षतामाथि प्रश्न उठाउँदै रास्वपाले गृहमन्त्रीको राजीनामा नआएसम्म संसद् चल्न नदिने अडान लिएको छ । बैठक सुरु भएको केही समयमै रास्वपाका सांसदहरू नाराबाजी गर्दै बाहिरिएका थिए ।
सत्तारूढ दलका एक सांसदले छानबिन समिति गठन भइसकेकाले रास्वपाले संसद् अवरुद्ध गर्नुको औचित्य नरहेको बताएका छन् । भिजिट भिसा प्रकरणमा गृहमन्त्री लेखकमाथि अनियमितता र नीतिगत भ्रष्टाचारको आरोप लाग्दै आएको छ । संसद् अवरोधका कारण महत्त्वपूर्ण विधेयक र छलफलहरू प्रभावित भएका छन्।
