काठमाडौं । साताको दोस्रो कारोबार दिन नेप्से परिसूचक बढेर बन्द भएको छ । पछिल्लो तीन कारोबार दिनदेखि घटिरहेको नेप्से, यस दिन भने बढेर बन्द भएको हो । आज नेप्से परिसूचक ८.६२ अङ्क बढेको हो । यो सँगै नेप्से २८६७ बिन्दुमा पुगेको छ ।
गत मङ्गलवार ३००२ अङ्कसम्म पुगेको बजार लगातार तीन कारोबार दिन कुल १४४ अङ्क घट्दै हिजो आइतबार २८५८ मा झरेको थियो ।
तीन दिनपछि बढेको बजारमा कारोबार रकम घटेको छ । अघिल्लो दिन १३ अर्ब ७ करोडको कारोबार भएकोमा आज १० अर्ब ८२ करोडको भयो । १४० कम्पनीको मूल्य बढ्दा ११० को घट्यो ।
आज बैङ्किङ ०.६८ प्रतिशत बढ्यो । जीवन बीमा ०.४३, माइक्रोफाइनान्स ०.५६, हाइड्रोपावर ०.०९ प्रतिशत बढे । होटल तथा पर्यटन ०.३९, विकास बैङ्क ०.०६, अन्य ०.४२, उत्पादन तथा प्रशोधन ०.२१, निर्जीवन बीमा ०.५३ तथा फाइनान्स ०.८२ प्रतिशतले घटे ।
सिक्लेस हाइड्रोपावरको ५।७३, स्वेतगंगा हाइड्रोपावरको ५।१२, विन्ध्यबासिनी हाइड्रोपावरको ४.७२ तथा माछापुच्छ्रे बैङ्कको ४.५१ प्रतिशत मूल्य बढ्यो ।
अघिल्लो दिनसम्म १० प्रतिशत मूल्य बढेको ट्रेड टावर आज १० प्रतिशत घट्यो । त्यस्तै थ्रीस्टार हाइड्रोपावरको ३.२६, नेपाल फाइनान्सको ३.१४ तथा सप्तकोशी विकास बैङ्कको ३.१४ प्रतिशत मूल्य घट्यो ।
आज धेरै कारोबार भएका पाँच कम्पनीमा हिमालयन रिइन्स्योरेन्स, शिवम् सिमेन्ट, हिमालयन डिस्टिलरी, ङादी ग्रुप पावर र नेपाल पुनर्बीमा क्रमशः अगाडि रहे ।
नेप्सेको वेबसाइट नै डाउन
नेप्सेको वेबसाइट आज शेयर बजार बन्द भएको केही समयपछि नै डाउन भएको छ । जसका कारण लगानीकर्ता वास्तविक बजार तथ्याङ्क पाउनबाट वञ्चित भएका छन् ।
बजार बन्द भएको करिब २०-२२ मिनेटपछि सामान्यतः नेप्सेले दिनभरको वास्तविक कारोबार विवरण सार्वजनिक गर्ने गर्छ । तर, आज बजार बन्द भएको करिब १ घण्टा बितिसक्दा पनि वेबसाइट खुलेको छैन । यो समाचार तयार पार्दासम्म पनि नेप्सेको वेबसाइट खुल्न सकेको छैन ।
