काठमाडौं । राष्ट्रिय स्वतन्त्र पार्टी (रास्वपा) सभापति रवि लामिछानेलाई नक्खु कारागार सरुवा गर्ने निर्णय भएको छ । हाल पुर्पक्षका लागि रुपन्देही जिल्ला कारागारमा रहेका लामिछानेले ललितपुरको नक्खु कारागारमा सरुवाका लागि निवेदन दिएका थिए ।
कारागार विभागका महानिर्देशक लीलाप्रसाद शर्माले लामिछानेको लिखित मागअनुसार नक्खु सरुवाको निर्णय भई रुपन्देही पठाइएको जानकारी दिए । रविले नक्खु कारागारमै सरुवा गर्न माग गरेका थिए ।
गृहमन्त्री रमेश लेखकले गत बिहीबार प्रतिनिधिसभाको कानुन, न्याय तथा मानव अधिकार समितिमा लामिछानेको सरुवा प्रक्रिया अघि बढिरहेको बताएका थिए ।
अब रुपन्देही कारागार, स्थानीय प्रशासन र सीडीओ कार्यालयले आवश्यक प्रक्रिया पूरा गरी लामिछानेलाई नक्खु ल्याउने छन् । शर्मा हालै गृह मन्त्रालयबाट सरुवा भई कारागार विभागको जिम्मेवारीमा आएका हुन् ।
