काठमाडौं । मानवअधिकार तथा शान्ति समाजले सरकारले नैतिक वैधानिकता गुमाएको बताएको छ । जेनजी पुस्ताले आह्वान गरेको प्रदर्शनको क्रममा राज्यबाट भएको बर्बर दमनपछि विज्ञप्ति जारी गर्दै समाजले सरकारले नैतिक वैधानिकता गुमाएको बताएको हो ।
विज्ञप्तिमा भनिएको छ, ‘युवा पुस्ताद्वारा जेनजीको नाममा भएको देशव्यापी विरोध प्रदर्शन आह्वानका क्रममा काठमाडौंको बानेश्वर क्षेत्रमा भएको प्रदर्शनमा प्रहरीको गोली लागेर एक दर्जन बढीको मृत्यु भएको (समाचार अनुसार १४ जना) र पत्रकारहरूसहित दर्जनौँ घाइते भएको (२३ गते अपराह्नसम्म) घटनाले मानव अधिकार तथा शान्ति समाज स्तब्ध एवं मर्माहत भएको छ ।’
भ्रष्टाचारको विरोध र सरकारको स्वेच्छाचारीविरुद्धको विरोध प्रदर्शनमा उत्रिएका युवा पुस्तामाथि अन्धाधुन्ध गोली हान्ने र मार्ने कार्य भएको समाजको निष्कर्ष छ ।
‘आफूले गरेका भ्रष्टाचारको ढाकछोप गर्न नागरिक मार्ने कार्य बर्बर एवं जघन्य अपराध हो । नागरिकमाथि क्रूरताको प्रदर्शन गर्ने सरकार लोकतान्त्रिक हुनु सक्दैन तसर्थ यो सरकारले नैतिक वैधानिकता गुमाइसकेको धारणा शान्ति समाजको छ। यस्तो क्रूरताको लागि जिम्मेवारहरुलाई दण्डित गर्नु आवश्यक छ,’ विज्ञप्तिमा भनिएको छ।
स्वाभिमान युवाहरू भ्रष्ट नेताहरूको नेतृत्वबाट मुक्ति चाहन्छन् भन्दै समाजले देशमा सुशासन र स्वतन्त्रताको पक्षमा उभिने युवा पुस्ता कुनै पनि निरंकुशताको विरोधमा हुने बताएको छ ।
