काठमाडौं । तातोपानी नाका जोड्ने अरनिको राजमार्गको कोदारी खण्डमा पहिरोले सडक अवरुद्ध छ ।
अवरुद्ध भएपछि भौतिक पूर्वाधार तथा यातायात मन्त्री कुलमान घिसिङले सडक विभागलाई तत्काल मार्ग खुलाउन निर्देशन दिएका छन्।
भोटेकोसी गाउँपालिका–२ का वडाध्यक्षको ध्यानाकर्षणपछि मन्त्री घिसिङले विभागका महानिर्देशक विजय जैसीलाई फोनमार्फत आवश्यक परे फिल्डमै गएर सडक खुलाउन आदेश दिएका हुन्।
दसैं नजिकिँदै गर्दा नाका बन्द हुँदा १५ सयभन्दा बढी कन्टेनर चीनतर्फ रोकिएका छन्। उद्योगी, व्यापारी र सर्वसाधारण प्रभावित भएका छन्।
साउन १८ देखि अवरुद्ध भएको सडक भदौ ५ मा केही दिन मात्र खुलेको थियो। इको पहिरो क्षेत्रको जटिलता र जोखिमले मर्मत कार्यमा समस्या भइरहेको छ। दीर्घकालीन समाधानका लागि संरचनात्मक उपायको तयारी भइरहेको मन्त्रीको सचिवालयले जनाएको छ।
