काठमाडौँ । नेपाली कम्युनिष्ट पार्टीले आफ्नो स्थापना घोषणासँगै २३ बुँदे प्रतिबद्धतापत्र सर्वसम्मत रूपमा स्वीकृत गरेको छ। पार्टीले राष्ट्रिय स्वाधीनता, भौगोलिक अखण्डता, स्वाभिमान र स्वतन्त्रताको रक्षा गर्ने प्रतिबद्धता व्यक्त गरेको छ।
प्रतिबद्धतापत्रमा पार्टीले समाजवादी क्रान्ति र वैज्ञानिक समाजवादको महान लक्ष्य प्राप्तिका लागि निरन्तर अघि बढ्ने योजना उल्लेख गरेको छ। साथै, वर्तमान संविधानको रक्षा, सङ्घीयता सुदृढीकरण, शासकीय सुधार र स्थानीय तह तथा प्रतिनिधिको सङ्ख्या व्यवस्थापनमा पहल गर्ने पनि प्रतिबद्धता व्यक्त गरिएको छ।
सबैभन्दा महत्वपूर्ण रूपमा, पार्टीले भ्रष्टाचार, अनियमितता र ढिलासुस्तीको अन्त्य गर्न उच्चस्तरीय अधिकारसम्पन्न सम्पत्ति छानबिन आयोग गठन गर्ने र हालसम्म सार्वजनिक पद धारण गरेका सबै व्यक्तिको सम्पत्ति छानबिन गरी भ्रष्टाचारीमाथि कडा कारबाही गर्ने योजना सार्वजनिक गरेको छ।
साथै, राज्यका सेवा प्रवाहलाई छरितो र चुस्त बनाउँदै शिक्षा, स्वास्थ्य लगायतका आधारभूत सेवामा आमजनताको पहुँच सुनिश्चित गर्ने पहल गर्ने पनि प्रतिबद्धता पत्रमा उल्लेख छ। पार्टीले विगतका कमी कमजोरीको समीक्षा गरी कार्यशैली सुधार, पुनर्गठन, आन्तरिक लोकतन्त्र सुदृढीकरण र नेतृत्व विकास तथा हस्तान्तरणको वैज्ञानिक विधि निर्माणमा ध्यान दिने पनि जनाएको छ।
पार्टीको संयोजकमा पुष्पकमल दाहाल ‘प्रचण्ड’ र सहसंयोजकमा माधवकुमार नेपाल चयन भएका छन्। यससँगै माओवादी केन्द्र, एकीकृत समाजवादी, नेपाल समाजवादी पार्टी, जनसमाजवादी पार्टी लगायत विभिन्न कम्युनिष्ट र समाजवादी समूहहरू एकताबद्ध भएर नयाँ पार्टी घोषणा गरिएको हो।
