नेपाल रेडक्रस सोसाइटीको महाधिवेशन स्थगित गर्न निर्देशन « Drishti News – Nepalese News Portal
Logo

नेपाल रेडक्रस सोसाइटीको महाधिवेशन स्थगित गर्न निर्देशन


- दृष्टि न्युज/संवाददाता


काठमाडौं, २२ असोज । नेपाल रेडक्रस सोसाइटी केन्द्रीय तदर्थ समितिको ४८औँ महाधिवेशनलाई अर्को व्यस्थापन नहुन्जेलसम्मका लागि जिल्ला प्रशासन कार्यालय काठमाडौँले स्थगित गरिदिएको छ । जिल्ला प्रशासन कार्यालय काठमाडौँले असोज १६ गते नेपाल रेडक्रस सोसाइटीको तदर्थ समितिलाई पत्र पठाउँदै महाधिवेशन स्थगित गर्न निर्देशन दिएको हो । रेडक्रस सोसाइटीले यही असोज २८–३० गतेका लागि महाधिवेशन मिति तोकेको थियो ।
सोसाइटीले २०७७ असोज ११ गते श्वेतपत्र जारी गर्दै महाधिवेशन तोकेको थियो । तर, जिल्ला प्रशासन कार्यालयले ‘संस्थाको नविकरण नगरेको र काठमाडौँ उपत्यकामा कोभिड–१९ को संक्रमण उच्च दरमा वृद्धि भइरहेको सन्दर्भमा नेपाल सरकार मन्त्रिपरिषदको मिति ०७७ भदौ २९ गतेको निर्णय बमोजिम कुनै पनि सभा, समारोह, सम्मेलनलगायत कार्यक्रम गर्न रोक लगाएको अवस्थामा अर्को आदेश नभएसम्म स्थगित गराउन निर्देशन दिइएको’ काठमाडौँ जिल्ला प्रशासन कार्यालयले नेपाल रेडक्रस सोसाइटीलाई लेखेको पत्रमा उल्लेख छ ।
सोसाइटीले बुधबार असोज २१ गते निर्वाचन तालिका र नामावली समेत सार्वजनिक गरिसकेको छ । साउन १२ गतेको मन्त्रिपरिषद बैठकले संजीव थापा नेतृत्वको नेपाल रेडक्रस सोसाइटी केन्द्रीय कार्यसमितिले भ्रष्टाचार गरेको ठहर गर्दै गत साउन १२ गते डा. नेत्र तिमिल्सिनाको संयोजकत्वमा नयाँ कार्य समिति गठन गरेको थियो । सोसाइटीका अध्यक्ष डा नेत्र तिमिल्सिनाले महाधिवेशन स्थगित गर्न जिल्ला प्रशासन कार्यालयले पत्रचार गरेको बताए ।

प्रतिक्रिया दिनुहोस्