काठमाडौं । नेकपा एमालेका अध्यक्ष केपी शर्मा ओलीले राष्ट्रिय सभामा मिलेर चुनाव लड्न नेपाली कांग्रेसका सभापति शेरबहादुर देउवासँग प्रस्ताव गरेका छन् ।
गत शुक्रबार ओलीले कांग्रेस सभापति देउवालाई महाराजगन्जस्थित उनको निवासमै पुगेर भेट गरेका थिए । भेटमा एमाले र कांग्रेसबीच सहकार्य गर्ने र राष्ट्रिय सभाको चुनाव पनि मिलेर लड्ने प्रस्ताव राखेको एक नेताले जानकारी दिएका छन् ।
राष्ट्रिय सभाका १९ जना सदस्यका लागि आगामी माघ ११ गते निर्वाचन हुँदै छ । रिक्त हुने १९ सदस्यमा सबैभन्दा धेरै एमालेका ८ जना छन भने तत्कालीन माओवादी केन्द्रका ७, एकीकृत समाजवादीका १, राष्ट्रपतिबाट मनोनीत १, जनता समाजवादी पार्टी नेपालका १ र लोकतान्त्रिक समाजवादी पार्टीका १ जना छन् ।
स्रोतका अनुसार ओली कांग्रेससँगको गठबन्धन ब्युँताउने कोसिसमा छन् । जेनजी आन्दोलनबाट सत्ताच्युत हुनुअघिसम्म कांग्रेसको समर्थनमा ओली प्रधानमन्त्री थिए । यस्तै, ओलीले संसद पुनर्स्थापनाका लागि पहल गर्न पनि देउवासँग आग्रह गरेका थिए ।
भेटलगत्तै आइतबार कांग्रेसले संसद् पुनर्स्थापना माग गर्दै सर्वोच्च अदालतमा रिट दायर गरेको छ । एमालेले मंसिर ९ गते नै सर्वोच्चमा यससम्बन्धी रिट दायर गरेको थियो । विघटित प्रतिनिधि सभामा एमालेका मुख्य सचेतक महेश बर्तौलाले देउवा–ओलीबीच रिट दायर गर्ने विषयमा छलफल भएको बताए।
यद्यपी ओली दम्पती र देउवा दम्पतीबीच भएको उक्त भेटमा के के कुराकानी भयो भन्ने स्पष्ट खुलाइएको छैन । ओलीको प्रस्ताव र त्यसमाथि देउवाको धारणा पनि औपचारिक रुपमा सार्वजनिक गरिएको छैन ।
जेनजी आन्दोलनका कारण भदौ २४ गते कांग्रेस–एमाले गठबन्धनका प्रधानमन्त्री केपी शर्मा ओलीले राजीनामा दिएका थिए। भदौ २७ गते प्रधानमन्त्री नियुक्त हुनेबित्तिकै सुशीला कार्कीले प्रतिनिधि सभा विघटनको सिफारिस गरेकी थिइन्।
