काठमाडौं । नेपालले एसीसी पुरुष यू-१९ एशिया कप अन्तर्गत लगातार दोस्रो हार बेहोरेको छ । सोमबार सम्पन्न खेलमा नेपाल बङ्गलादेशसँग ७ विकेटले पराजित भएको हो ।
नेपालले दिएको १३१ रनको लक्ष्य पछाएको बङ्गलादेशले २४.५ ओभरमा ३ विकेट गुमाउँदै लक्ष्य पुरा गरेको हो ।
यसअघि टस हारेर पहिला ब्याटिङ गरेको नेपालले ३१.१ ओभरमा अल आउट हुदै १३० रन बनाएको थियो ।
नेपालका लागि अभिशेख तिवारीले सर्बाधिक ३० रन बनाए भने आशिष लुहारले २३, साहिल पटेलले १८ र निरज कुमार यादवले १४ रन बनाएका थिए । त्यस्तै बङ्गलादेशका बलर मोहमद सोबुजले ३ विकेट लिए भने साद इस्लाम, शाहरिआर अल अमिम र अजुजुल हाकिमले २-२ विकेट लिएका थिए ।
यो हारसँगै नेपालको सेमिफाइनलको सम्भावना लगभग सकिएको छ । अब नेपालले अन्तिम खेल अफगानिस्तानसँग बुधवार खेल्ने तालिका रहेको छ ।
