एजेन्सी । अमेरिकी राष्ट्रपति डोनाल्ड ट्रम्पले भेनेजुएलामा आउने र त्यहाँबाट जाने सबै तेल ट्यांकरहरूमाथि पूर्ण नाकाबन्दी गर्न आदेश दिएका छन् ।
सामाजिक संजाल ट्रुथ सोसलमा एक पोस्ट गर्दै ट्रम्पले भेनेजुएलामाथि आतंकवाद, लागूऔषध तस्करी र मानव तस्करीमा संलग्न भएको आरोप लगाउँदै उक्त आदेश दिएका हुन् ।
उनले भनेका छन्, ‘आज म भेनेजुएलामा आउने र त्यहाँबाट जाने सबै प्रतिबन्धित तेल ट्यांकरहरूको पूर्ण र सम्पूर्ण नाकाबन्दीको आदेश दिइरहेको छु ।’
यो आदेश आउनुभन्दा एक हप्ताअगाडि मात्र अमेरिकाले भेनेजुएलाको तटनजिकै एउटा तेल ट्यांकर नियन्त्रणमा लिएको थियो । भेनेजुएलाका राष्ट्रपति निकोलस मादुरोले उक्त कदमलाई ‘समुद्री लुट’ भनेका थिए ।
ट्रम्पको यो नयाँ आदेशले अन्तर्राष्ट्रियस्तरमा तेलको मूल्यमा ठूलो हलचल आउने अनुमान गरिएको छ ।
