काठमाडौं । निर्वाचन आयोगले सामाजिक सञ्जालको प्रयोगलाई सकारात्मक सन्देश प्रवाहमा प्रोत्साहन गर्ने कडाइ गर्ने नीति लिएको जनाएको छ ।
आयोगले शुक्रवार नियमित पत्रकार सम्मेलन मार्फत यस सम्बन्धमा मेटा र टिकटकका प्रतिनिधिसँग सम्पर्क भइसकेको जनाएको छ ।
उनीहरूले अघिल्ला निर्वाचनझैँ सहयोग गर्ने प्रतिबद्धता जनाएको आयोगका सहसचिव एवम प्रवक्ता नारायणप्रसाद भट्टराईले जानकारी दिए ।
निर्वाचन आयोगले सबै सामाजिक सञ्जाल प्लेटफर्महरूलाई औपचारिक रूपमा पत्राचार गरिसकेको र आवश्यक परे सम्झौता (एमओयु) गरेर अघि बढ्ने तयारी भइरहेको जनाएको छ ।
