काठमाडौं । बङ्गलादेशको एक अदालतले पूर्वप्रधानमन्त्री शेख हसिनालाई भ्रष्टाचारको अभियोगमा १० वर्षको जेल सजाय सुनाएको छ।
विशेष न्यायाधीश अदालत–४ का न्यायाधीश मोहम्मद रबिउल आलमको इजलासले ढाकानजिकैको सरकारी टाउनसिप परियोजनासँग सम्बन्धित दुई भ्रष्टाचार मुद्दामा हसिनालाई दोषी ठहर गरेको हो । सोही मुद्दामा उनकी भतिजी तथा बेलायती सांसद ट्युलिप सिद्दिकलाई चार वर्ष, अर्की भतिजी अजमिना सिद्दिक र भतिजा रादवान मुजीब सिद्दिकलाई सात–सात वर्षको जेल सजाय सुनाइएको छ ।
भ्रष्टाचार निगरानी निकायले हसिनाले सरकारी अधिकारीसँग मिलेमतो गरी पूर्बाचल न्यू टाउन परियोजनामा नियमविपरीत आफ्ना तथा परिवारका सदस्यका लागि ६ वटा प्लट सुरक्षित गरेको आरोप लगाउँदै मुद्दा दायर गरेको थियो ।
नोबेल शान्ति पुरस्कार विजेता मुहम्मद युनुसको नेतृत्वमा रहेको अन्तरिम सरकारले फेब्रुअरी १२ मा निर्वाचनको तयारी गरिरहेका बेला यो फैसला आएको हो। यसअघि सत्तारूढ अवामी लिगलाई चुनावमा भाग लिन प्रतिबन्ध लगाइएको छ ।
हसिना यसअघि पनि सोही परियोजनासम्बन्धी अन्य चार भ्रष्टाचार मुद्दामा दोषी ठहर भई कुल २६ वर्षको जेल सजाय पाइसकेकी छिन् । उनी सन् २०२४ अगस्ट ५ देखि भारतमा निर्वासनमा छन् र मानवताविरुद्धको अपराधको अभियोगसमेत सामना गरिरहेकी छिन् ।
