पार्टी एकता गम्भीर संकटको मोडमाः महासचिव पौडेल « Drishti News – Nepalese News Portal
Logo

पार्टी एकता गम्भीर संकटको मोडमाः महासचिव पौडेल


- दृष्टि न्युज/संवाददाता


काठमाडौं, १६ कात्तिक ।
नेकपाका महासचिव तथा अर्थमन्त्री विष्णु पौडेले पार्टी एकता गम्भीर संकटको मोडमा पुगेको बताएका छन् । पार्टीको अन्तरविरोधलाई संवादबाट हल गर्न उनले आग्रह गरेका छन् ।


फेसबुकमा स्टाटस लेख्दै उनले पार्टीभित्र बढेको समस्या हल गर्न आग्रह गरेका हुन् ।

उनले फेसबुकमा लेखेका छन्–

राजनीतिक स्थायीत्व सुनिश्चित गर्ने, संविधानको प्रभावकारी कार्यान्वयन गर्ने र ‘समृद्ध नेपाल सुखी नेपाली’को राष्ट्रिय आकाँक्षा पूरा गर्दै समाजवादतर्फ अघि बढ्ने उद्देश्यका साथ नेकपा (एमाले) र नेकपा (माओवादी केन्द्र) बीच एकता सम्पन्न भई नेपाल कम्युनिष्ट पार्टी (नेकपा) गठन भएको थियो ।

पार्टी एकता सम्पन्न भएसँगै हाम्रो सामु एक वर्षभित्र महाधिवेशन आयोजना गर्ने र सुदृढ एकताका साथ अघि बढ्ने जिम्मेवारी उपस्थित थियो । तर, आजसम्म आईपुग्दा पनि पार्टी एकताको बाँकी काम पूरा हुन नसकेको मात्र होइन, पार्टीको एकीकृत तथा अविभाज्य अस्तित्वमाथि समेत बारम्बार प्रश्न उठेको छ । यतिबेला पार्टी एकता गंभीर संकटको मोडमा आईपुगेको छ ।
नेतृत्व तहमा उत्पन्न अन्तरविरोधले पार्टी एकताको औचित्य खण्डित हुन सक्तैन । तसर्थ आपसी अन्तरविरोधलाई संवादको कार्यसूची बनाउन, सहमतिका साथ समाधान खोज्न र पार्टी एकताको रक्षा एवम् विकासका लागि सकारात्मक योगदान गर्न समस्त नेता, कार्यकर्ता तथा सदस्य कमरेडहरुलाई अनुरोध गर्दछु ।

प्रतिक्रिया दिनुहोस्