काठमाडौं । विश्वव्यापी तनावका बीच जापानले तेल अभावको सामना गर्न भण्डारणमा रहेको तेल बजारमा ल्याउने निर्णय गरेको छ ।
जापानकी प्रधानमन्त्री साने ताकाइचीले यस महिनाको अन्त्यदेखि राष्ट्रिय तेल भण्डार प्रयोगमा ल्याइने घोषणा गरेकी छन् । उनका अनुसार मार्च २६ देखि भण्डारण गरिएको तेल बजारमा पठाइनेछ, जसले पेट्रोलियम पदार्थको आपूर्तिमा अवरोध हुन नदिने लक्ष्य राखिएको छ । उनले बढ्दो अन्तर्राष्ट्रिय तनावका बीच देशभित्र ऊर्जा आपूर्ति स्थिर राख्न यस्तो कदम चालिएको स्पष्ट पारेकी छन् ।
यसैबीच दक्षिण कोरियाका विदेशमन्त्री चो ह्यूनले इरानका विदेशमन्त्रीसँग टेलिफोन वार्ता गर्दै जारी द्वन्द्व र यसको विश्व अर्थतन्त्रमा पर्ने असरबारे चिन्ता व्यक्त गरेका छन् ।
उनले होर्मुज जलडमरुमा देखिएको तनाव कम गर्न आवश्यक कदम चाल्न इरानलाई आग्रह गर्दै त्यहाँ अड्किएका जहाज र चालक दलको सुरक्षामा ध्यान दिनुपर्ने बताएका छन् ।
