काठमाडौं । राष्ट्रिय स्वतन्त्र पार्टीका वरिष्ठ नेता बालेन शाह आज संसदीय दलको नेता चयन हुँदैछन् ।
दिउँसो २ बजे प्रतिनिधिसभा सदस्यको शपथ लिएपछि उनलाई रास्वपाले दलको नेता चयन गर्न लागेको हो । त्यसका लागि रास्वपाको केन्द्रीय समिति बैठक बस्दैछ ।
बैठकमा बालेनलाई दलको नेता चयन गर्ने सम्बन्धी छलफल हुनेछ । त्यसलगत्तै संसदीय दलको बैठक बसेर बालेनलाई दलको नेता चयन गरिने सचिवालय सदस्य गणेश पराजुलीले जानकारी दिए ।
त्यसपछि पार्टीले उनलाई संसदीय दलको नेता चयन गरिएको जानकारी राष्ट्रपति कार्यालयलाई दिनेछ । बालेनले
शुक्रबार मध्यान्ह १२ बजेर ३४ मिनेटमा प्रधानमन्त्रीको पद तथा गोपनीयताको शपथ लिने तयारी गरेका छन् ।
रास्वपा महामन्त्री कवीन्द्र बुर्लाकोटीका अनुसार १३ चैत दिउँसो १२ः३४ बजे राष्ट्रपति रामचन्द्र पौडेलले रास्वपा वरिष्ठ नेता बालेन्द्र शाहलाई शपथग्रहण गराउनेछन् । शपथग्रहण समारोहमा सातवटा शंखबाट शंखनाद गरिनेछ । १०८ जना बटुकबाट स्वस्तिशान्ति वाचन गरिनेछ । १६ जना बौद्ध भिक्षुबाट अष्टमंगल पाठ गरिने छ ।
बुर्लाकोटीका अनुसार प्रधानमन्त्रीसँगै शीतलनिवासमा मन्त्रीहरूले पनि शपथ लिनेछन् । पहिलोपटकमै मन्त्रिमण्डललाई पूर्णता दिने तयारी छ । मन्त्रालय संख्या अधिकतम १५ बनाउने गृहकार्य छ । शपथपछि बालेनले २ बजेर १५ मिनेटमा सिंहदरबारस्थित प्रधानमन्त्री तथा मन्त्रिपरिषद् कार्यालयमा पद बहाली गर्ने कार्यतालिका छ ।
