काठमाडौं । प्रतिनिधि सभा नियमावली मस्यौदा समितिले सभा सञ्चालनका लागि आवश्यक नियमावली पुनरावलोकन गरिरहेको छ ।
सत्तारुढ दल राष्ट्रिय स्वतन्त्र पार्टीका सांसद गणेश पराजुलीको सभापतित्वमा गठित समितिले कार्यसम्पादन गरिरहेको भएपनि समितिभित्र सहमतिको वातावरण बन्न नसकेको मस्यौदा समितिका सदस्य एवं नेकपा (एमाले)का सांसद ऐन महरले बताएका छन् । उनले संसद् र सरकारलाई लोकतान्त्रिक, पारदर्शी र जनउत्तरदायी बनाउनेगरी नियमावली पुनरावलोकन भइरहेको बताए ।
यद्यपि नियमावली निर्माण प्रक्रिया प्रारम्भ हुँदा सत्ता र प्रतिपक्ष दुवैले सर्वसम्मतिका आधारमा अगाडि बढ्ने पूर्वसहमतिअनुसार सत्तापक्ष उदार हुन नसकेको उनको आरोप छ । उनले सरकार र संसदलाई जनता र मुलुकप्रति थप उत्तरदायी बनाउने आफूहरूको विचार भएपनि सत्तापक्षले बुहमतको अहङ्कार र दम्भ प्रस्तुत गरिरहेको आरोप लगाए । प्रतिनिधि सभा नियमावलीको ५० प्रतिशतभन्दा बढी विषयमा सहमति जुटिसकेको महरले बताए ।
सहमतिमा पुग्न नसकेका विषयलाई तत्कालको लागि थाती राखेर अघि बढिरहेको महरको भनाइ छ । उनले भने, ‘प्रतिनिधि सभा नियमावली मस्यौदा समितिमा छलफल भइरहेको छ । हामीले संसदलाई बढी जनउत्तरदायी, पारदर्शी र लोकतान्त्रिक बनाउने प्रयास गरिरहेका छौं । सुरुमा सत्तापक्ष पनि सर्वसम्मतिमा जान तयार देखिएको थियो, तर अहिले छलफलको पाँचौं दिनसम्म उनीहरूले संख्यात्मक बहुमत र अहङ्कार देखाएका छन् ।’ नियमावलीको करिब आधा विषयमा सहमति भइसकेको छ, बाँकीमा २०७९ को नियमावलीमा टेकेर छलफल चलिरहेको छ ।
