पोर्चुगल। नेपालको मौलिक संस्कृति तथा पहिचान झल्काउने साकेला उभौली पर्वको अवसरमा किरात राई सोसाइटी पोर्चुगलद्वारा आयोजना गरिएको छ ।
कार्यक्रममा प्रमुख अतिथिका रूपमा नेपाली राजदूतावास, लिस्बनका प्रथम सचिव राम बाबु नेपालको उपस्थिति रहेको थाियो । त्यसैगरी, विशेष अतिथिहरूमा गैरआवासीय नेपाली संघ पोर्चुगलका अध्यक्ष सुजन लामा मोक्तान, गैरआवासीय नेपाली संघका युरोप क्षेत्रीय संयोजक रोबर्ट लिम्बु, एफआइबीआइकी अध्यक्ष मुना राई, जनजाति महासंघ पोर्चुगलका अध्यक्ष चोप मगर, किराँत राई सोसाइटी स्पेनका अध्यक्ष युवराज राई तथा श्रम तथा संस्कृति पार्टी पोर्चुगलका अध्यक्ष विकास आले लगायत विभिन्न संघ–संस्थाका प्रतिनिधिहरूको उल्लेखनीय सहभागिता थियो ।
यस्तै, अतिथिहरूमा प्रवासी नेपाली मञ्च पोर्चुगलका अध्यक्ष दीपक खत्री, नेपाल राष्ट्रिय तामाङ घेदुङ पोर्चुगलका अध्यक्ष भीम लामा, शेर्पा क्यिदुग पोर्चुगलका अध्यक्ष राजेन्द्र शेर्पा लगायत विभिन्न जातीय तथा सामुदायिक संस्थाका अध्यक्ष एवं प्रतिनिधिहरूको बाक्लो उपस्थितिले कार्यक्रमलाई थप गरिमामय बनाएको थियो।
नेपाली संस्कृति नै हाम्रो पहिचान र गौरव: अध्यक्ष मोक्तान
कार्यक्रममा बोल्दै एनआरएनए पोर्चुगलका अध्यक्ष सुजन लामा मोक्तानले नेपाल बहुभाषिक, बहुजातीय तथा बहुसांस्कृतिक देश भएको उल्लेख गर्दै नेपाली संस्कृति नै हाम्रो पहिचान र गौरव भएको धारणा व्यक्त गरे।
उनले आवश्यकता अनुसार विभिन्न संस्थाहरूबीच सहकार्य गर्दै आगामी दिनमा पनि यस्ता सांस्कृतिक तथा प्रेरणादायी कार्यक्रमहरूलाई निरन्तरता दिनुपर्नेमा जोड दिए। साथै, साकेला उभौली पर्वले नेपाली समुदायबीच आपसी एकता, सद्भाव, भाइचारा तथा सांस्कृतिक पहिचानलाई अझ सुदृढ बनाउने विश्वास समेत उनले व्यक्त गरे।
त्यस्तै, प्रमुख अतिथि राम बाबु नेपालले विदेशमा रहेर पनि नेपाली कला, संस्कृति तथा मौलिक परम्पराको संरक्षण गर्दै नयाँ पुस्तासम्म हस्तान्तरण गर्नु अत्यन्त प्रशंसनीय कार्य भएको बताउँदै आयोजक संस्थाको सराहना गरे।
किरात राई सोसाइटी पोर्चुगलका अध्यक्ष अधिराज सोताङ राईको अध्यक्षतामा सम्पन्न उक्त कार्यक्रमलाई सफल बनाउन सहयोग पुर्याउने सम्पूर्ण आयोजक, अतिथि तथा उपस्थित महानुभावहरूप्रति संस्थाले हार्दिक आभार व्यक्त गरेको छ।
