काठमाडौं । नेपाल र बंगलादेशबीच जारी दक्षिण एसियाली फुटबल महासंघ (साफ) महिला च्याम्पियनसिपअन्तर्गत सेमिफाइनलको पहिलो हाफ १–१ को बराबरीमा सकिएको छ ।
भारतको गोवास्थित जवाहरलाल नेहरु रंगशालामा जारी खेलेको २३औँ मिनेटमा नेपालले अग्रता लिएको थियो । दीपा शाहीको कर्नरमा बनेको मुभमा गीता रानाले बललाई जाली चुमाएकी हुन् ।
पहिलो हाफको इन्जुरी समयमा रितु पोर्ना चक्माले बंगलादेशका लागि बराबरी गोल फर्काइन् । उनको कर्नर प्रहार सिधै गोलमा परिणत भएको थियो ।
नेपालले पाएको केही अवसरलाई सदुपयोग गर्न सकेन । दीपाकै कर्नरमा ३४औँ मिनेटमा रश्मीकुमारी घिसिङको हेडरलाई बंगलादेशकी गोलकिपर मिली अख्तरले सहजै नियन्त्रणमा लिइन् ।
नेपालले खेलको ३६औँ मिनेटमा अग्रता दोब्बर गर्ने अवसर गुमायो । प्रीति राईको प्रहार क्रस बारमा लागेर फर्किएको थियो ।
