काठमाडौं । अमेरिका र इरानबीच भएको शान्ति सम्झौताको घोषणापछि एसियाली बजारमा कारोबार सुरु हुने क्रममा अन्तर्राष्ट्रिय तेलको मूल्यमा उल्लेखनीय गिरावट आएको छ ।
अमेरिकी राष्ट्रपति डोनाल्ड ट्रम्पले सम्झौताअनुसार विश्व व्यापारका लागि महत्त्वपूर्ण समुद्री मार्ग होर्मुज जलडमरूमध्य पुनः सञ्चालनमा ल्याइने बताएका छन् । त्यसपछि विश्व बजारमा तेल आपूर्तिसम्बन्धी चिन्ता कम हुँदा मूल्य घट्न पुगेको हो ।
वैश्विक मानक ब्रेन्ट कच्चा तेलको मूल्य ३.८ प्रतिशतले घटेर प्रतिव्यारेल ८४.०२ अमेरिकी डलरमा पुगेको छ। त्यस्तै, अमेरिकी बजारमा कारोबार हुने कच्चा तेलको मूल्य ४.१ प्रतिशतले घटेर प्रतिव्यारेल ८१.४० अमेरिकी डलरमा झरेको छ।
पाकिस्तानका प्रधानमन्त्री शहबाज शरीफले अमेरिका र इरानबीचको सम्झौतामा आगामी जुन १९ मा स्विट्जरल्यान्डमा औपचारिक हस्ताक्षर हुने बताएका छन् ।
यसपछि ट्रम्पले सामाजिक सञ्जालमार्फत क्षेत्रीय समुद्री मार्गबाट तेलको निर्बाध ढुवानी पुनः सुरु हुने बताएका छन्। अमेरिका र इजरायलले गत फेब्रुअरी २८ देखि इरानमाथि हवाई आक्रमण सुरु गरेपछि होर्मुज जलडमरूमध्य प्रभावकारी रूपमा बन्द रहेको थियो ।
विश्वको करिब २० प्रतिशत कच्चा तेल र तरलीकृत प्राकृतिक ग्यासको आपूर्ति यही समुद्री मार्ग हुँदै हुने भएकाले यसको सञ्चालनले विश्व ऊर्जा बजारमा ठूलो प्रभाव पार्ने गरेको छ ।
हालका महिनाहरूमा विश्व ऊर्जा बजारमा तीव्र उतारचढाव देखिएको थियो। युद्ध सुरु हुनुअघि ब्रेन्ट कच्चा तेलको मूल्य प्रतिव्यारेल करिब ७० अमेरिकी डलर रहेकोमा द्वन्द्व चर्किएसँगै यो बढेर करिब १२० अमेरिकी डलरसम्म पुगेको थियो ।
