काठमाडौं । फिफा विश्वकप २०२६ को राउन्ड अफ १६ मा नर्वेसँग २-१ गोल अन्तरले पराजित हुँदै ब्राजिल प्रतियोगिताबाट बाहिरिएपछि स्टार खेलाडी नेयमारले अन्तर्राष्ट्रिय फुटबलबाट सन्यासको घोषणा गरेका छन् ।
अमेरिकाको न्यु जर्सीस्थित मेटलाइफ स्टेडियममा भएको यो हारले ब्राजिलको विश्वकप यात्रालाई पूर्णविराम लगाएको हो । नर्वेका एर्लिङ हालान्डले खेलको ७९औँ र ९०औँ मिनेटमा दुई गोल गर्दै टोलीलाई ऐतिहासिक जित दिलाए। खेलको इन्ज्युरी समयमा ब्राजिलका लागि नेयमारले पेनाल्टीमार्फत सान्त्वना गोल गरे पनि त्यो जितका लागि पर्याप्त भएन। सन् १९९० पछि विश्वकपको यो चरणबाट ब्राजिल बाहिरिएको यो पहिलो पटक हो। खेलको अन्तिम सिट्टी बज्नासाथ मैदानमा भक्कानिँदै ढलेका ३४ वर्षीय नेयमारलाई उनका सहकर्मीले सान्त्वना दिएका थिए ।
खेलपछि ग्लोबो सञ्चारमाध्यमसँग कुरा गर्दै नेयमारले भने, ‘मैले प्रयास गरेँ । अब यो सकियो । मैले यहाँबाट सुरु गरेँ, मैले यहाँबाट अन्त्य गरेँ ।’ सन् २०१० मा यही मेटलाइफ स्टेडियममा अमेरिकाविरुद्धको मैत्रीपूर्ण खेलबाट अन्तर्राष्ट्रिय डेब्यु गरेका नेयमारले आफ्नो अन्तिम खेल पनि सोही स्थानमा खेलेका हुन् ।
नेयमारले आफ्नो अन्तर्राष्ट्रिय करियरमा १३० खेल खेल्दै ८० गोल गरेका छन् । उनी ब्राजिलका लागि सर्वाधिक गोल गर्ने खेलाडी हुन्, जुन कीर्तिमान महान खेलाडी पेलेभन्दा तीन गोल बढी हो । उनी ब्राजिलका लागि सर्वाधिक खेल खेल्ने सूचीमा काफु (१४२ खेल) पछि दोस्रो स्थानमा छन् । साथै, उनी चारवटा फरक विश्वकपमा गोल गर्ने दोस्रो ब्राजिलियन खेलाडीसमेत हुन् ।
अब नर्वेले ११ जुलाईमा मियामीमा हुने क्वाटरफाइनलमा इंगल्याण्ड वा मेक्सिकोसँग प्रतिस्पर्धा गर्नेछ । हालान्डले यो प्रतियोगितामा सात गोल गरिसकेका छन् । उनी गोल्डेन बुटको दौडमा सामेल भएका छन् ।
