काठमाडौं । जारी फिफा विश्वकप फुटबलको उपाधि रक्षा अभियानमा रहेको अर्जेन्टिनाले आइतबार बिहान क्वार्टरफाइनलमा स्विट्जरल्यान्डको सामना गर्दै छ । क्यान्ससमा हुने यो खेल नेपाली समय अनुसार बिहान ६:४५ बजेदेखि सुरु हुँदै छ ।
अर्जेन्टिना अन्तिम १६ को खेलमा इजिप्टविरुद्ध २-० ले पछाडि परेको अवस्थाबाट शानदार पुनरागमन गर्दै ३-२ को जित निकाल्दै क्वार्टरफाइनल पुगेको हो । निर्धारित समय सकिन १२ मिनेट बाँकी रहँदा लियोनेल मेसीको पासमा क्रिस्टियन रोमेरोले गोल गर्दै टोलीलाई खेलमा फर्काएका थिए । त्यसपछि मेस्सीले बराबरी गोल गरे भने अतिरिक्त समयमा एन्जो फर्नान्डेजले विजयी गोल गर्दै अर्जेन्टिनालाई अन्तिम आठमा पुर्याए । त्यसअघि अर्जेन्टिनाले अतिरिक्त समयमा केप भर्डेलाई हराउँदै अर्को ठूलो झट्काबाट पनि आफूलाई जोगाएको थियो । लगातार कठिन अवस्थाबाट पुनरागमन गर्दै आएको अर्जेन्टिनाले उपाधि रक्षा गर्ने आफ्नो लक्ष्यलाई अझ मजबुत बनाएको छ ।
३९ वर्षीय कप्तान मेसीले इजिप्टविरुद्ध गोल गर्दै अर्को ऐतिहासिक कीर्तिमान बनाए । उनी विश्वकपको लगातार छ वटा नकआउट खेलमा गोल गर्ने पहिलो खेलाडी बनेका छन् । साथै विश्वकपको अन्तिम चरणमा उनको यो नवौँ गोल पनि हो, जुन नयाँ कीर्तिमान बनेको छ ।
यद्यपि इजिप्टविरुद्ध पहिलो हाफमा पेनाल्टी गुमाएपछि उनले अर्को अवाञ्छित कीर्तिमान पनि बनाए । यसअघि समूह चरणमा अस्ट्रियाविरुद्ध पनि पेनाल्टी चुकाएका मेसी एउटै विश्वकप संस्करणमा दुई पेनाल्टी असफल पार्ने पहिलो खेलाडी बने ।
हालसम्म यस विश्वकपमा मेसीले आठ गोल गरिसकेका छन् । क्वार्टरफाइनलअघि कुनै पनि खेलाडीले यति धेरै गोल गरेका छैनन् । दक्षिण अमेरिकी खेलाडीमध्ये एकै विश्वकपमा सबैभन्दा धेरै गोल गर्ने कीर्तिमान भने ब्राजिलका अडेमिरको नाममा छ, जसले सन् १९५० मा नौ गोल गरेका थिए ।
मेसीसँगै लाउतारो मार्टिनेज र जुलियन आल्भारेजको आक्रमण पङ्क्तिले उत्कृष्ट प्रदर्शन गरिरहेको छ । अर्जेन्टिनाले सन् २०१८ को विश्वकपमा क्रोएसियासँग ३९० ले पराजित भएयता विश्वकपका लगातार १४ खेलमा गोल गरेको छ ।
यति मात्र होइन, अर्जेन्टिनाले लगातार ११ विश्वकप खेलमा कम्तीमा दुई गोल गरेको छ । यो विश्वकप इतिहासकै संयुक्त सबैभन्दा लामो शृङ्खला हो । यसअघि उरुग्वेले सन् १९३० देखि १९५४ सम्म लगातार ११ खेलमा दुई वा सोभन्दा बढी गोल गरेको थियो ।
अर्जेन्टिना विश्वकपका पछिल्ला ११ खेलमा अपराजित पनि छ । यस अवधिमा उसले नौ खेल जितेको छ भने दुई खेल बराबरी खेलेको छ । आक्रमण उत्कृष्ट देखिए पनि अर्जेन्टिनाको रक्षापङ्क्ति केही कमजोर देखिएको छ । क्वार्टरफाइनलमा पुगेका टोलीमध्ये स्पेनपछि सबैभन्दा कम लक्ष्यतर्फ प्रहार सामना गरेको टोली अर्जेन्टिना हो । तर विपक्षीका नौ लक्ष्यतर्फका प्रहारमध्ये पाँच गोलमा परिणत भएका छन् ।
यसले देखाउँछ कि अवसर कम दिए पनि अर्जेन्टिनाले त्यसलाई रोक्न भने सङ्घर्ष गरिरहेको छ । त्यसैले सुरुमै पछि परे पुनरागमन गर्न फेरि कठिन हुन सक्छ । अर्कोतर्फ स्विट्जरल्यान्ड यस विश्वकपमा अहिलेसम्म कुनै पनि खेलमा पछि परेको छैन । छनोट चरणदेखि अन्तिम चरणसम्म गरेर टोली लगातार ११ खेलमा अपराजित रहँदै आएको छ । अन्तिम १६ मा स्विट्जरल्यान्डले कोलम्बियालाई १२० मिनेटसम्म गोलरहित बराबरीमा रोकेपछि पेनाल्टी सुटआउटमा ४-३ ले हराएको थियो । गोलरक्षक ग्रेगोर कोबेल त्यस खेलका नायक बनेका थिए ।
सन् १९५४ पछि पहिलो पटक विश्वकपको क्वार्टरफाइनल पुगेको स्विट्जरल्यान्ड अनुभवी खेलाडीहरूले भरिएको टोली भएकाले दबाबमा पनि बलियो प्रदर्शन गर्ने विश्वास गरिएको छ । रक्षक रिकार्डो रोड्रिगेजको सबैभन्दा ठूलो जिम्मेवारी मेस्सीलाई रोक्ने हुनेछ। उनले सन् २०१४ यता प्रमुख अन्तर्राष्ट्रिय प्रतियोगितामा ३१ खेल खेलिसकेका छन् । मध्यपङ्क्तिका कप्तान ग्रानिट झाकाले यस विश्वकपमा अन्तिम तेस्रो क्षेत्रमा सबैभन्दा धेरै प्रभावकारी पास दिएका छन् ।
आक्रमणतर्फ ब्रिल एम्बोलो पछिल्ला १७ अन्तर्राष्ट्रिय खेलमा ११ गोल र दुई गोलका अवसर सिर्जना गर्दै उत्कृष्ट लयमा छन् ।दुवै टोलीबीच हालसम्म सात पटक प्रतिस्पर्धा हुँदा स्विट्जरल्यान्डले एक खेल पनि जित्न सकेको छैन । अर्जेन्टिनाले पाँच खेल जितेको छ भने दुई खेल बराबरीमा सकिएका छन् । विश्वकपमा यी दुई टोली दुई पटक आमनेसामने भएका छन् र दुवै खेल अर्जेन्टिनाले जितेको थियो । सन् १९६६ मा २-० र सन् २०१४ मा १-० को जित अर्जेन्टिनाको पक्षमा गएको थियो ।
स्विट्जरल्यान्डको दक्षिण अमेरिकी टोलीविरुद्धको इतिहास पनि धेरै राम्रो छैन। विश्वकपमा दक्षिण अमेरिकी राष्ट्रसँग खेलेका १० खेलमध्ये उसले केवल एक खेल मात्र जितेको छ। तीन खेल बराबरी र छ खेलमा पराजय बेहोरेको छ ।
अर्जेन्टिना आक्रमणमा अत्यन्तै बलियो देखिए पनि रक्षात्मक कमजोरी उसका लागि चुनौती बन्न सक्छ। अर्कोतर्फ स्विट्जरल्यान्ड अनुशासित रक्षा, सन्तुलित मध्यपङ्क्ति र धैर्यपूर्ण खेलशैलीका कारण कठिन प्रतिद्वन्द्वी साबित भएको छ। त्यसैले आइतबारको क्वार्टरफाइनलमा अर्जेन्टिनाको अनुभव र स्विट्जरल्यान्डको संगठित प्रदर्शनबीच रोचक प्रतिस्पर्धा हुने अपेक्षा गरिएको छ ।
