काठमाडौँ । अर्जेन्टिनालाई हराउँदै स्पेनले फिफा विश्वकप २०२६ को उपाधि जितेको छ।
अमेरिकाको न्युयोर्कस्थित न्यु जर्सी स्टेडियममा भएको रोमान्चक फाइनल खेलमा अर्जेन्टिनालाई १–० ले पराजित गर्दै स्पेनले १६ वर्षपछि विश्वकपको उपाधि पुन: आफ्नो नाममा गरेको हो।
स्पेनलाई च्याम्पियन बनाउन फेरान टोरेसले गरेको एक मात्र गोल नै निर्णायक बन्यो। टोरेसले खेलको १०६औँ मिनेटमा गोल गर्दै स्पेनलाई अग्रता दिलाएका थिए। उनले पेनाल्टी बक्सभित्र बाउन्स भइरहेको बललाई देब्रे खुट्टाले प्रहार गर्दै क्रसबारको ठीक मुनिबाट जाली चुमाएका थिए।
निर्धारित ९० मिनेटको खेल गोलरहित बराबरीमा टुङ्गिएपछि खेल अतिरिक्त समयमा धकेलिएको थियो। निर्धारित समयको अन्तिमतिर एन्जो फर्नान्डेजले दोहोरो पहेँलो (रातो) कार्ड पाउँदै मैदान छाडेपछि अर्जेन्टिना १० खेलाडीमा सीमित भएको थियो। १० खेलाडीमा समेटिएको अर्जेन्टिनाविरुद्ध अतिरिक्त समयको दोस्रो हाफको सुरुवातमै स्पेनले गोल गर्दै अग्रता लिएको थियो।
खेलभरि नै अधिकांश समय अर्जेन्टिनालाई दबाबमा राखेको स्पेनले यसअघि सन् २०१० मा पहिलोपटक विश्वकपको उपाधि जितेको थियो।
यस प्रतियोगिताका आठ खेलहरूमा स्पेनले मात्र एक गोल व्यहोऱ्यो। यो कुनै पनि च्याम्पियन टोलीले विश्वकप इतिहासमै सबैभन्दा कम गोल खाएको नयाँ कीर्तिमान हो।
यस जितसँगै स्पेन पछिल्ला ३८ खेलहरूमा अपराजित रहेको छ, जसमा २९ जित र ९ बराबरी समावेश छन्। यो कुनै पनि युरोपेली टोलीले बनाएको इतिहासकै सबैभन्दा लामो अपराजित यात्रा हो। यसअघि इटालीले अक्टोबर २०१८ देखि सेप्टेम्बर २०२१ सम्म बनाएको ३७ खेल (२८ जित, ९ बराबरी) को कीर्तिमानलाई स्पेनले भङ्ग गरेको हो। पछिल्लो दुई वर्षभन्दा बढी समयदेखि स्पेन पराजित भएको छैन।
यता फाइनलमा पराजित भएसँगै लगातार दोस्रोपटक विश्वकप उपाधि जित्ने अर्जेन्टिनाको सपना भने अधुरै रह्यो। अर्जेन्टिनाले सन् २०२२ को विश्वकप जितेको थियो।
