काठमाडौं । बाराको जीतपुरसिमरा उपमहानगरपालिका–१ दुसधराकी ३ वर्षीया बालिका गरिमा चौधरीको बलात्कारपछि हत्या प्रकरणमा पक्राउ पर्नेको संख्या ८ पुगेको छ । मुख्य आरोपी मानिएका सुमन थापाले पोलेका प्रदीप खड्कालाई प्रहरीले नियन्त्रणमा लिएसँगै यो घटनामा पक्राउ पर्नेको संख्या ८ पुगेको हो ।
जीतपुर सिमरा उपमहानगरपालिका–२ बस्ने कक्षा ९ मा अध्ययनरत १४ वर्षीय खड्कालाई आइतबार साँझ पक्राउ गरिएको र बारा प्रहरीको हिरासतमा राखेर थप अनुसन्धान भइरहेको इलाका प्रहरी कार्यालय सिमराका प्रहरी नायब उपरीक्षक दयाकृष्ण भट्टले जानकारी दिए ।
सुमन थापाको भाइरल भिडिओमा प्रदीपलाई उनले पोलेका थिए । प्रदीपकै योजना र अगूवाईमा बालिकामाथि अपराध गरेको उनको दाबी छ । घटनापछि प्रदीप त्यहाँबाट भागेको उनले बताएका छन् । सुमनको सोधपुछको भिडिओ सामाजिक सञ्जालमा आएपछि मात्र प्रहरीले प्रदीपलाई समातेको हो ।
गरिमाको शव भेटिएपछि प्रहरीले सुरुमा सुमन थापा र प्रोग्रेस चौधरीलाई पक्राउ गरेको थियो । अनुसन्धानका क्रममा प्राप्त सूचना र प्रमाणका आधारमा प्रहरीले थप व्यक्तिहरूलाई नियन्त्रणमा लिएको जनाएको छ । गरिमाको परिवारले दिएको पूरक जाहेरीपछि शनिबार प्रहरीले थप पाँच जनालाई पक्राउ गरेको हो । प्रहरीले पक्राउ परेका अन्य व्यक्तिहरूको पहिचान भने हालसम्म सार्वजनिक गरेको छैन ।
घटनामा बालिकामाथि सामूहिक बलात्कार भएको हुनसक्ने आशंका गरिएको छ । यद्यपि, त्यसबारे अनुसन्धान पूरा नभएसम्म यकिन निष्कर्षमा पुग्न नसकिने प्रहरीले जनाएको छ ।
