काठमाडौं । सेयर बजार परिसूचक नेप्सेल नयाँ उचाइ कायम गरेको छ । साताको पहिलो दिन आइबार सेयर बजार परिसूचक नेप्से २५ दशमलव ७१ अंकले वृद्धि हुँदा २ हजार ६ सय ५७ दशमलव ६१ अंकको ऐतिहासिक उचाइमा पुगेको हो ।
यसअघि, गएको फागुन ६ गते २ हजार ६ सय ४० दशमलव ३५ अंकको उचाइ कायम गरेर झरेको नेप्सेले आइतबार उक्त रेकर्ड ब्रेक गरेको हो । आइतबार बजार परिसूचकले ऐतिहासिक रेकर्ड कायम गर्दा ९ अर्ब बढीको कारोबार भएको छ । ९ अर्ब ६८ लाख ५९ हजार रुपैयाँ बराबरको कारोबार हुँदा १ करोड ८१ लाख ७३ हजार ३७८ कित्ता सेयर किनबेच भएको हो ।
नेप्से ० दशमलव ९८ प्रतिशतले बढे पनि व्यापार, होटेल तथा पर्यटन, उत्पादन, म्युचुअल फन्ड र लगानी उपसूचक भने घटेको छ । व्यापार उपसूचक सर्वाधिक ४ दशमलव ३९ प्रतिशत र लगानी उपसूचक २ दशमलव ३५ प्रतिशतले घटेको हो ।
यस दिन सात कम्पनीको शेयर सकारात्मक सर्किट लेभलमा कारोबार भएको छ। कारोबारमा आएको वोमी माइक्रोफाइनान्स, जनरल इन्स्योरेन्स, राधी विद्युत कम्पनी, आइएमई जनरल इन्स्योरेन्स, एनआईसी एशिया लघुवित्त, सानिमा जनरल इन्स्योरेन्स र साञ्जेन जलविद्युतको शेयर सकारात्मक सर्किट लेभलमा कारोबार भएको हो।
