स्पेनले दियो नेपाललाई १४ करोडको स्वास्थ्य सामग्री, बिहीबार सरकारलाई हस्तान्तरण गर्दै « Drishti News – Nepalese News Portal
Logo

स्पेनले दियो नेपाललाई १४ करोडको स्वास्थ्य सामग्री, बिहीबार सरकारलाई हस्तान्तरण गर्दै


दृष्टि संवाददाता


काठमाडौं । कोरोनाभाइरस महामारी रोकथाम तथा नियन्त्रणका लागि स्पेनले नेपाललाई १४ करोड रुपैयाँ बराबरको स्वास्थ्य सामग्री सहयोग गरेको छ ।

स्पेनस्थित नेपाली राजदूतावासका अनुसार बुधबार राति राजधानी म्याड्रिडबाट आइवेरिया एयरलाइन्सको एक चार्टर्ड विमान भेन्टिलेटर, अक्सिजन कन्सन्ट्रेटर, पीपीईलगायतका स्वास्थ्य सामग्री सहित काठमाडौँका लागि उडेको छ ।

स्पेनका लागि नेपाली राजदूत दावाफुटी शेर्पा स्वास्थ्य सामग्रीहरु लिएर नेपाल प्रस्थान गरेकी छन् । राजदूतसँगै नेपाल उडेका अन्तर्राष्ट्रिय सहयोगका लागि स्पेनिस एजेन्सी एईसीआईडीका निर्देशक म्याग्डी मार्टिनेज सोलिमानले स्वास्थ्य सामग्रीहरु बिहीबार नेपाल सरकारलाई हस्तान्तरण गर्दैछन्।

यसअघि सहयोगका लागि अनुरोध गर्दै दूतावासले स्पेनको परराष्ट्र मन्त्रालय, स्वास्थ्य मन्त्रालय र निजी क्षेत्र चेम्बर अफ कमर्सलाई पनि पत्राचार गरेको थियो ।

यसैबीच बुधबार परराष्ट्रमन्त्री प्रदीपकुमार ज्ञवालीले स्पेनका विदेशमन्त्री अराँचा गोन्जलेज लयसँग टेलिफोन कुराकानी गरेका थिए। उनले नेपाललाई स्वास्थ्य सामग्रीहरु उपलब्ध गराएकोमा स्पेन सरकारलाई धन्यवाद दिए। टेलिफोन कुराकानीमा दुई देशबीचको हित र सहकार्यको विषयमा कुराकानी भएको परराष्ट्र मन्त्रालयले जनाएको छ ।

स्पेनको परराष्ट्र मन्त्रालयका अनुसार आइवेरिया एयरलाइन्सको चार्टर्ड विमानबाट नेपालमा रहेका ४७ स्पेनिसहरुलाई स्वदेश फिर्ता ल्याउने भएको छ ।

प्रतिक्रिया दिनुहोस्