पश्चिम बंगालमा चट्याङ लागेर एकैदिन २३ जनाको मृत्यु « Drishti News – Nepalese News Portal
Logo

पश्चिम बंगालमा चट्याङ लागेर एकैदिन २३ जनाको मृत्यु


दृष्टि संवाददाता


काठमाडौं । भारतको पश्चिम बंगालमा चट्याङ लागेर एकैदिन २३ जनाको ज्यान गएको छ । सोमबार राति राज्यको ३ जिल्लामा गरी कुल २३ जनाको ज्यान गएको बीबीसीले जनाएको छ । तीब्र हावाहुरीका कारण अन्य कैयौं व्यक्ति घाइते भएको खबर आएको सरकारी तथ्यांकमा उल्लेख छ ।

यसैबीच भारतीय प्रधानमन्त्री नरेन्द्र मोदीले चट्याङबाट ज्यान गुमाएका परिवारको लागि राष्ट्रिय विपत्ति राहत कोषबाट २ लाख रुपैयाँ क्षतिपूर्ति दिने घोषणा गरेका छन् । उनले ट्वीटरमार्फत् घाइतेहरुलाई जनही ५० हजार रुपियाँ दिने घोषणा पनि गरेका छन् ।

राज्यमा सत्तारूढ टीएमसीका राष्ट्रिय महासचिव, सांसद अभिषेक बनर्जीले बुधबार र बिहिबार तीनै जिल्लाका मृतकको घरमा गएर आफन्तहरूलाई भेट्ने तयारीमा रहेको भारतीय सञ्चारमाध्यमले जनाएका छन् ।

सरकारी अधिकारीहरूका अनुसार ज्यान जानेमा हुग्लीका १० जना, मुर्शिदाबादका नौ जना, हावडामा दुई र पश्चिम मेदिनीपुर जिल्लामा दुई जना रहेका छन् ।

यस्तै महाराष्ट्रको पुनेमा एक केमिकल कारखानामा भएको आगलागीमा १८ जनाको ज्यान गएको छ । ज्यान जानेमा सबै मजदुर रहेको बीबीसीले जनाएको छ ।

पुनेको घटनामा पनि ज्यान गुमाएका कर्मचारीका परिवारलाई २ लाख क्षतिपूर्ति र घाइतेलाई ५० हजार रूपैयाँ दिने घोषणा प्रधानमन्त्री मोदीले गरेका छन् । यो कारखाना पुणेको घोटावाडे फाटा क्षेत्रमा अवस्थित छ।

प्रतिक्रिया दिनुहोस्