इथियोपियामा अनिकालले ३ लाख ४३ हजार जनसंख्या संकटमा « Drishti News – Nepalese News Portal
Logo

इथियोपियामा अनिकालले ३ लाख ४३ हजार जनसंख्या संकटमा


दृष्टि संवाददाता


काठमाडौं । इथियोपियामा अनिकालले ३ लाख ४३ हजार जनसंख्या संकटमा परेका छन् । संयुक्त राष्ट्रसंघले जनाए अनुसार इथियोपियाको टिग्रे क्षेत्रमा अनिकालबाट ३ लाख ४३ हजार जनसंख्या संकटमा परेको हो ।

तीमध्ये करिब ३३ हजार बालबालिकाको भोकमरी र कुपोषणबाट मृत्यु हुनसक्ने चेतावनी पनि दिइएको छ । संयुक्त राष्ट्रसंघ र सहायता समूहहरुको अध्ययनको आधारमा यो चेतावनी दिइएको हो ।

संयुक्त राष्ट्रसंघको सहायता प्रमुख मार्क लोकोकले भनेका छन्, ‘टिग्रेमा अहिले अनिकाल छ ।’ बालबालिकाको क्षेत्रमा कार्यरत संयुक्त राष्ट्रसंघको संस्था युनिसेफका अनुसार टिग्रेमा खानेकुराको अभावका कारण विनासको जस्तो स्थिति आइलागेको छ र यसको कारण ठूलो संख्या (खासगरी बालबालिका) भोकमरीको चपेटामा पर्न सक्छन् । युनिसेफले टिग्रे क्षेत्रमा मानवीय सहायता पुर्याउन अपीलसमेत गरेको छ ।

बीबीसीका अनुसार यद्यपि इथियोपियाले भने संयुक्त राष्ट्रसंघबाट भएको अध्ययनको आधारमा निकालिएको यो निष्कर्षप्रति असहमति जनाएको छ । सरकारी र विद्रोही पक्षबीच जारी संघर्षका कारण टिग्रे क्षेत्र जर्जर अवस्थामा छ । बीबीसीका अनुसार सन् २०२० को नोभेम्बर महिनादेखि जारी संघर्षबाट सो क्षेत्रबाट करिब १७ लाख विस्थापित भइसकेको छ ।

प्रतिक्रिया दिनुहोस्