मोरङ । प्रदेश नं १ का मुख्यमन्त्री राजेन्द्रकुमार राईले अपांगता भएका व्यक्तिका लागि आरक्षण कायम गरी संरक्षण गर्नु राज्यको मुख्य दायित्व भएको बताएका छन् ।
नेपाल उद्योग वाणिज्य महासंघ प्रदेश नं १, राष्ट्रिय अपांग महासंघ र करुणा फाउन्डेसनद्वारा संयुक्त रुपमा विराटनगरको जैनभवनमा आजदेखि सञ्चालन गरिएको दुईदिने अपांगता समावेशी रोजगारी मेला–२०२२ को उद्घाटन गर्दै उनले अपांगता भएका व्यक्तिलाई समाजमा समावेशिता कायम गरी विकासको मूल प्रवाहमा ल्याउन रोजगार मेला सहयोगी एवं उपयोगी हुने धारणा राखे ।
उनले सरकारले विकासका पूर्वाधार निर्माणका साथसाथै जनतालाई तत्काल राहत र सेवासुविधा दिने कार्यमा सँगसँगै लाग्नुपर्नेमा जोड दिए । मुख्यमन्त्री राईले अपांगता भएका व्यक्तिलाई आवश्यक तालिम तथा सीप प्रदान गर्नु सरकारको दायित्व भएकाले यस सम्बन्धमा आगामी दिनमा कानुन निर्माण गरी कार्यान्वयन गर्न आग्रहसमेत गरे ।
सामाजिक विकासमन्त्री राजन राईले सरकार तथा निजी क्षेत्रले निर्माण गर्ने पूर्वाधार अपांगमैत्री हुनुपर्नेमा जोड दिँदै शिक्षण संस्था तथा अस्पताल अपांगमैत्री हुनुपर्ने बताए ।
मुख्यमन्त्रीका आर्थिक सल्लाहकार एवं नेपाल उद्योग वाणिज्य महासंघका केन्द्रीय सदस्य राजेन्द्र राउतले महासंघ आबद्ध सदस्यलाई अपांगता भएका व्यक्तिहरुको दक्षता र शैक्षिक योग्यताका आधारमा रोजगारी उपलब्ध गराउन प्राथमिकता दिएको धारणा राखे ।
राष्ट्रिय अपांग महासंघका प्रदेश अध्यक्ष नवीनचन्द्र ढुङ्गेल, कुष्ठरोग निवारण संस्थाका अध्यक्ष शोभा कँडेल, करुणा फाउन्डेसनका योगेन्द्र गिरी र राष्ट्रिय बहिरा महासंघ नेपालका अध्यक्ष केपी अधिकारीले मुलुकको विकासमा अपांगता व्यक्तिको रोजगारीले सहयोग पुर्याउने धारणा राखे ।
विभिन्न उद्योग, बैंक, होटल, सुरक्षा प्रदान गर्ने संस्था गरी ३५ कक्षबाट एक सय अपांगता भएका व्यक्तिले दक्षता, सीप एवं शैक्षिक योग्यताका आधारमा रोजगारी उपलब्ध हुने विश्वास उद्योग वाणिज्य महासंघका प्रदेश निर्देशक श्याम भण्डारीले बताए । प्रदेशमा २८ हजार अपांगता भएका व्यक्ति छन् ।
