काठमाडौं । नेपाल समाजवादी पार्टीका अध्यक्ष डा बाबुराम भट्टराईले विचार र मुद्दा मिल्ने पार्टीबीच एकीकरण हुनुपर्ने बताएका छन् । देशमा समाजवादी ध्रुवीकरणको प्रयत्न गर्नुपर्ने आवश्यक रहेको भन्दै पूर्वप्रधानमन्त्रीसमेत रहेका डा भट्टराईले यस्तो बताएका हुन् ।
आइतबार बसेको पार्टीको राजनीतिक समिति बैठकमा राजनीतिक प्रतिवदन पेश गर्दै डा भट्टराईले देशमा राजनीतिक स्थायित्व, शान्ति, समृद्धिका लागि समुन्नत समाजवादमा आधारित एउटा सशक्त समाजवादी केन्द्रको आवश्यकता रहेको उल्लेख गरेका छन् ।
देशको राजनीतिमा दक्षिणपन्थी, यथास्थितिवादी शक्तिहरुको बोलवाला बढ्दै गएको भन्दै उनले आफ्नो प्रतिवेदनमा उल्लेख गरेका छन्, ‘समाजवादी पार्टी निर्माणका लागि थुप्रै चुनौतिहरु छन् । हामी एक्लैले ती चुनौतिहरु समाना गर्न सम्भव हुँदैन । त्यसका लागि हामी मुद्दा मिल्ने पक्ष, समूह, व्यक्ति र व्यक्तित्वहरुसँग सहकार्य गर्दै जानुपर्छ भने विचार र मुद्दा मिल्नेहरुसँग पार्टी एकीकरण गर्नुपर्छ ।’
