कास्की । गण्डकी प्रदेश सरकारले आगामी आर्थिक वर्षको लागि नीति तथा कार्यक्रम ल्याउने तयारी गरेको छ । आइतबार दिउँसो २ बजे बस्ने प्रदेशसभा बैठकमा नीति तथा कार्यक्रम प्रस्तुत गर्ने तयारी भएको प्रदेशसभा सचिवालयले जनाएको छ । प्रदेश प्रमुख पृथ्वीमान गुरुङले उक्त नीति तथा कार्यक्रम पढ्ने तयारी रहेको सचिवालयका सचिव हरिराज पोखरेलले जानकारी दिए ।
सरकारले यसअघि जेठ १२ गतेको प्रदेशसभाको बैठकमा विनियोजन विधेयक, २०८० को सिद्धान्त र प्राथमिकता पेश गरेको थियो । १५ र १६ गते दुई दिन प्रदेशसभामा छलफल गरिएपछि पास गरिएको थियो । सो पछि आज नीति तथा कार्यक्रम ल्याइने भएको हो । प्रदेश सरकारले असार १ गते बजेट ल्याउनुपर्ने संवैधानिक व्यवस्था छ । बजेट ल्याउनुपूर्व नीति तथा कार्यक्रम ल्याउनुपर्ने परम्परा अनुसार नै आज प्रदेशसभामा प्रस्तुत गर्न लागिएको प्रदेशसभा सचिवालयले जनाएको छ । नीति तथा कार्यक्रमलाई समेटेर नै आगामी वर्षको बजेट तय गरिन्छ ।
चालु आवमा ३५ अर्व ९० करोड ९० लाखको बजेट ल्याएको प्रदेश सरकारले आगामी वर्षको लागि बजेट घटाएर ल्याउने तयारी गरेको छ । गत वर्ष नीति तथा कार्यक्रममा नसमेटिएको सांसद विकास कोषलाई बजेट पास गर्ने बेलामा शीर्षक फेरेर (पूर्वाकार विकास कार्यक्रम) यस वर्ष निरन्तरता दिने तयारी रहेको स्रोतले जनाएको छ । गण्डकीका ३६ निर्वाचन क्षेत्रमा ७२ करोड विनियोजन हुँदै आएको छ ।
स्रोतका अनुसार नीति तथा कार्यक्रममा कुनै नयाँपन छैन । ‘परम्परागत शैलीमै नीति कार्यक्रम बनाइएको छ’ स्रोतले भन्यो, ‘२०४८ मा पहिलोपटक आएको नीति कार्यक्रम कस्तो थियो रु त्यही शैलीमा छ अहिलेको पनि ।’ उनले नयाँ इनोभेसन गर्ने खालको कार्यक्रम नभएको बताए ।
