एजेन्सी । अमेरिकाले इरानमा खतरनाक जीबीयू–५७ म्यासिभ अर्डनन्स पेनेट्रेटर (एमओपी) बम खसालेको अनुमान गरिएको छ । गएराति अमेरिकाले इरानका तीन प्रमुख परमाणु स्थलहरू फोर्दो, नतान्ज र इस्फहानमा गरेको सैन्य आक्रमणमा मुख्य हतियार बी–२ स्पिरिट स्टेल्थ बम वर्षकबाट खसालिएको अनुमान गरिएको हो ।
यो बम विश्वकै सबैभन्दा शक्तिशाली गैर–परमाणु बंकर बस्टिङ हतियार मानिन्छ, जसको तौल १३ हजार ६०० किलोग्राम छ । यो ६१ मिटर गहिराइसम्म कंक्रिटमा प्रवेश गरेर विस्फोट गर्न सक्छ ।
जीबीयू–५७ बम : विश्वकै शक्तिशाली बंकर बस्टिङ हतियार
रक्षा विशेषज्ञहरूका अनुसार, जीबीयू–५७, जसलाई म्यासिभ अर्डनन्स पेनेट्रेटर (एमओपी) भनिन्छ, अमेरिकाले मात्र प्रभावकारी रूपमा प्रयोग गर्न सक्ने हतियार हो ।
यो बम मिसौरीको ह्वाइटम्यान एयर फोर्स बेसबाट उड्ने बी–२ स्पिरिट स्टेल्थ बम वर्षकबाट खसालिन्छ । समाचार एजेन्सी रोयटर्सले उद्धृत गरेको एक अमेरिकी अधिकारीका अनुसार, इरानमाथिको आक्रमणमा बी–२ बमवर्षकहरू संलग्न थिए ।
यो बमको डिजाइन बोइङ कम्पनीले गरेको हो र यसको लम्बाइ ६ मिटर छ । यो ५०,००० फिटको उचाइबाट खसालिन्छ, जसले गर्दा यसले गति ऊर्जा (काइनेटिक इनर्जी) प्राप्त गर्छ र जमिनमा गहिरो प्रवेश गर्न सक्छ ।
बमको बाहिरी भाग अत्यन्त बलियो बनाइएको छ, ताकि टक्कर हुँदा पनि यसको संरचना नबिग्रयोस् । यसको पछाडि जडान गरिएको डिले फ्युजिङ सिस्टमले ५,३०० पाउन्ड विस्फोटक सही गहिराइमा पुगेर विस्फोट गरोस् भन्ने सुनिश्चित गर्छ । प्रायः एकभन्दा बढी बम खसालिन्छ—पहिलो बमले बाटो बनाउँछ भने दोस्रो वा अन्य बमले लक्षित स्थल पूर्ण रूपमा ध्वस्त गर्छ ।
परमाणु हतियारबाहेक, यो बमलाई विश्वकै सबैभन्दा ठूलो बंकर बस्टिङ हतियार मानिन्छ । यसको परीक्षण अमेरिकाको न्यू मेक्सिकोस्थित ह्वाइट स्यान्ड्स मिसाइल रेन्जमा गरिएको थियो, तर युद्धमा यसको प्रयोग पहिलोपटक भएको मानिन्छ ।
यो म्यासिभ अर्डनन्स एयर ब्लास्ट (एमओएबी) बमभन्दा पनि शक्तिशाली छ, जसलाई ‘मदर अफ अल बोम्ब्स’ भनिन्छ र सन् २०१७ मा अफगानिस्तानमा प्रयोग गरिएको थियो ।
