काठमाडौं । मनाङको तिलिचो बेस क्याम्पमा नेपाल टेलिकमले फोरजी सेवा सुरु गरेको छ ।
सञ्चार तथा सूचना प्रविधि मन्त्री जगदीश खरेलले टेलिकम इञ्जिनियर निरज गुप्तासँग भिडियो कलमार्फत सेवा शुभारम्भमा खुसी व्यक्त गर्दै दुर्गम क्षेत्रमा सञ्चार पहुँच विस्तार गर्ने सरकारको प्रयास सफल हुँदै गएको बताए ।
चार हजार ३५० मिटर उचाइमा अवस्थित तिलिचो रुटमा माइक्रोवेभ प्रविधिबाट टुजी र फोरजी सेवा विस्तार गरिएको हो । अब यस क्षेत्रमा रहेका पर्यटक, व्यवसायी तथा स्थानीयवासीले सहज रूपमा डिजिटल भुक्तानी, आफन्तसँग सम्पर्क, र आपतकालीन उद्धारका लागि संचार सेवा उपयोग गर्न सक्नेछन्।
इञ्जिनियर गुप्ताका अनुसार, फोरजी सेवाले पर्यटन प्रवर्द्धन, व्यवसाय सञ्चालन, स्वास्थ्य संकटमा उद्धार र स्थानीयलाई डिजिटल पहुँचमा सहुलियत दिनेछ । तिलिचो ताल विश्वकै उच्च स्थानमा अवस्थित तालहरूमध्ये एक हो, र संचार सेवा विस्तारले यो क्षेत्रको समग्र विकासमा योगदान पुर्याउने अपेक्षा गरिएको छ ।
