काठमाडौं । नेपाली कांग्रेसका महामन्त्रीद्वय गगन थापा र विश्वप्रकाश शर्मा सभापति शेरबहादुर देउवा निवास महाराजगञ्ज पुगेका छन् । पार्टीभित्रको विवाद समाधान गर्न देउवाले बोलाएपछि उनीहरु केहि बेरअघि देउवा निवास पुगेका हुन् ।
व्याप्त विवाद निरूपणको अन्तिम प्रयास स्वरूप महामन्त्रीद्वय देउवालाई भेट्न महाराजगन्ज पुगेको वार्ता समितिका सदस्य प्रदीप पौडेलले जानकारी दिए ।
भृकुटीमण्डपमा दोस्रो विशेष महाधिवेशन जारी रहँदा पार्टी देउवाले अन्तिम निर्णय निकाल्नका लागि संस्थापन र इतर पक्षलाई बोलाएका थिए । संस्थापन र इतर पक्षका नेताहरु पुगेपछि बैठक अहिले बसिरहेको छ ।
मंगलबार दिनभर र राति अबेरसम्म विभिन्न चरणमा भएका वार्ताहरु नेतृत्व परिवर्तनको विषयमा सहमति नहुँदा निष्कर्षविहीन भएका थिए । आजको यो वार्तामा पनि कुरा नमिलेमा संस्थापन र इतर दुवै समूह आआफ्नो बाटो लाग्ने नेताहरू बताउँछन्।
