काठमाडौं । अमेरिकी राष्ट्रपति डोनाल्ड ट्रम्पले क्यानडाबाट आयात हुने सामानमा शतप्रतिशत भन्सार शुल्क लगाउने चेतावनी दिएका छन् । क्यानडाले हालै चीनसँग गरेको कृषि तथा विद्युतीय सवारी साधनसम्बन्धी व्यापार सम्झौताको प्रतिक्रियास्वरुप ट्रम्पले कडा कदम चाल्ने धम्की दिएका हुन् ।
यो घोषणाले उत्तर अमेरिकी व्यापारिक सम्बन्धमा ठूलो तनाव पैदा गरेको छ । यसैबीच, अमेरिकाको मिनियापोलिसमा सङ्घीय एजेन्टहरूको गोली लागेर एकजनाको मृत्यु भएको छ । स्थानीय अधिकारीहरूका अनुसार अध्यागमन अपरेसनका क्रममा ३७ वर्षीय नर्स एलेक्स जेफ्री प्रेटीको गोली लागि मृत्यु भएको हो ।
सरकारी एजेन्टहरूले प्रेटीले हतियार देखाएको दाबी गरे पनि मिनियापोलिस प्रहरी र गभर्नर टिम वाल्जले उक्त दाबीलाई अस्वीकार गरेका छन् । प्रत्यक्षदर्शीको भिडियोमा प्रेटीले केवल मोबाइल फोन समातेको देखिएपछि स्थानीय र सङ्घीय सरकारबीच विवाद चर्किएको छ । घटनाको विरोधमा मिनियापोलिसमा व्यापक प्रदर्शन सुरु भएको छ । सुरक्षाका लागि नेशनल गार्ड परिचालन गरिएको छ । गभर्नर वाल्जले सङ्घीय एजेन्टहरूलाई राज्य छोड्न निर्देशन दिएका छन् ।
