काठमाडौं । पूर्वप्रधानमन्त्री एवम् नेकपा एमाले अध्यक्ष केपी शर्मा ओलीले नवनियुक्त प्रधानमन्त्री बालेन्द्र शाह (बालेन)लाई बधाई दिएका छन् ।
शपथ ग्रहण समारोहमा नगएका ओलीले सामाजिक सञ्जालबाट बालेनलाई बधाई दिएका हुन् ।
बालेनको शपथ ग्रहण समारोहमा पूर्वप्रधानमन्त्रीहरू पुष्पकमल दाहाल प्रचण्ड, माधवकुमार नेपाल, झलनाथ खनाल र बाबुराम भट्टराई सहभागी भएका थिए । तर, ओली अनुपस्थित भएका थिए ।
पूर्वप्रधानमन्त्री शेरबहादुर देउवा पनि विदेशमा रहेका कारण समारोहमा उपस्थित थिएनन्। तर, ओली भने काठमाडौँमै रहे पनि बालेनको शपथ समारोहमा नगएका हुन् ।
‘राष्ट्रिय स्वतन्त्र पार्टीका वरिष्ठ नेता बालेन्द्र शाह प्रधानमन्त्री नियुक्त हुनु भएकोमा हार्दिक बधाई। नवनियुक्त सम्माननीय प्रधानमन्त्री शाह लगायत मन्त्रिपरिषदका सबै सदस्यको कार्यकाल सफलताको शुभकामना व्यक्त गर्दछु,’ उनले भनेका छन्।
