काठमाडौं । पेसागत महासङ्घ नेपालका पूर्व अध्यक्ष तथा भारत र भूटानका लागि पूर्व राजदूत प्रा.हर्ष नारायण धौभडेलको निधनमा १३ औँ दिनको पुन्य तिथिमा भदौ ११ गते महासङ्घको आयोजनामा शोक तथा श्रद्धाञ्जली सभा सम्पन्न भएको छ ।
कार्यक्रममा स्वर्गीय धौभडेल तथा आएको बाढी पहिरोमा ज्यान गुमाएका जनहरुको सम्झनामा १ मिनेट मौन धारण तथा स्वर्गीय धौभडेलको तस्बिरमा सहभागी सबैबाट फुल गुच्छाले श्रद्धाञ्जली व्यक्त गरिएको थियो । परिवारसहति क्यानाडामा रहेका समयमा प्रा.धौभडेलको २०८३ श्रावण ३० गते निधन भएको थियो ।
श्रद्धाञ्जली सभामा प्रतिनिधि सभा सांसद तथा पूर्व राजदूत प्रमेशकुमार हमाल , रुसका लागि पूर्व राजदूत हिरण्यलाल श्रेष्ठ , भारतका लागि पूर्व राजदूत प्रा.लोक राज बराल, त्रिभुवन विश्व विधालयका पूर्व उपकुलपति प्रा. कमलकृष्ण जोशी, वरिष्ठ पत्रकार शम्भु श्रेष्ठ , महासङ्घका पूर्व अध्यक्षहरू विश्वनाथ प्याकुरेल र प्रमोद शर्मा , सल्लाहकार लेखनाथ गुरागाईँ र परिवारजनको तर्फबाट भतिज राजेश धौभडेको सहभागिता रहेको थियो । राजेश धौभडेलले स्वर्गीय धौभडेलले मुलुकको लोकतान्त्रिक एवं मानवअधिकारको आन्दोलन, पेसागत आन्दोलन र शैक्षिक क्षेत्रमा पुर्याएको योगदानको विविध पक्षबाट चर्चा गर्दै धौभडेलबाट सिक्नुपर्ने विषयमा उल्लेख गरेका थिए ।
कार्यक्रममा महासङ्घका अध्यक्ष प्रेमलकुमार खनालले प्रा.धौभडेलको शैक्षिक ,लोकतान्त्रिक, मानवअधिकार र कूटनैतिक क्षेत्रमा पुर्याएको योगदानका साथै मुलुकको पेसागत आन्दोलनमा पुर्याएको योगदानबारेमा विस्तृत रूपमा विवरण प्रस्तुत गर्नुभएको थियो । साथै अध्यक्ष खनालले प्रा.धौभडेलले विसं २०२१ सालमा लेख्नुभएको कविता वाचन पनि गर्नु भएको थियो । वासुदेव अधिकारीले पनि कविता वाचन गरेको उक्त कार्यक्रमको संचालन महासचिव राजन रेग्मीले गर्नु भएको थियो ।
यहाँ प्रा.धौभडेलबाट लेखिएको कविता उल्लेख गरिएको छ ।
कविता शीर्षक : किन ?
कवि : हर्ष नारायण धौभडेल
यो देश बनाउन सजिलो जति म सम्झन्छु
यो देश बनाउन गाहारो उति मलाई लाग्छ ?
किन ?
हामी नेपाली एउटा यस्तो चरित्रको
पुर्ख्यौली लिएर गुम्सिएकाछौं
कि बाहिर बाहिर हामी बहादुर छौँ
सिर्फ अरूहरुको इशारामा कुद्न
र
भित्र भित्र हामी कातर छौँ
खान्छौं आफैले आफैलाई
बाली सप्रेको बेलामा पनि।
अब त धिक्कार्न मन लाग्छ
यो संस्कार र पुख्यौली सम्पत्तिलाई
छि ! अब त धिन पनि लागि सक्यो ।
एउटा बम पडकाउनु परेको छ ।
आफूभित्रका कसिंगरको संहार गर्नलाई ।
प्रस्तुत कविता हाल क्यानाडा निवासी डाक्टर नारायण पोख्रेलले नेपाल टच अनलाइनमा आफ्नो लेख मार्फत उल्लेख गर्नु भएको छ ।
