काठमाडौं । नेपाल राष्ट्र बैङ्कले नयाँ डिजाइन तथा विशेषतासहितको ५० रुपैयाँ दरको बैंकनोट आजदेखि चलनचल्तीमा ल्याएको छ । राष्ट्र बैङ्कको मुद्रा व्यवस्थापन विभागले सूचना जारी गर्दै नयाँ नोटबारे जानकारी दिएको हो ।
राष्ट्र बैङ्कका अनुसार नयाँ ५० रुपैयाँको नोट साबिककै आकार तथा रङमा हुनेछ । नोटको अग्रभागमा ‘श्री नेपाल राष्ट्र बैङ्क, नेपाल सरकारको जमानत प्राप्त यसको रुपैयाँ भुक्तानी माग्न आएमा नेपाल राष्ट्र बैङ्कबाट रुपैयाँ ५० रुपैयाँ पचास तुरुन्त पाइनेछ’ भन्ने प्रतिज्ञात्मक वाक्यांश रहनेछ ।
नोटको अग्रभागमा हिमालको चित्र तथा लालीगुराँसको पानी छाप राखिएको छ । साथै, सूर्यको मुनि ‘५०’ अङ्कित पानी छापसमेत रहनेछ। नोटको तल्लो भागमा विक्रम संवत् २०८२ लेखिएको छ ।
नयाँ नोटमा नेपाल राष्ट्र बैङ्कका गभर्नर विश्वनाथ पौडेलको दस्तखत रहनेछ । १.२ मिलिमिटर चौडा कागजमा बनाइएको सुरक्षण धागो प्रकाशतर्फ हेर्दा पूर्ण रूपमा देखिने र उक्त धागोमा ‘एनआरबी’ लेखिएको राष्ट्र बैङ्कले जनाएको छ । नोटको पछाडिको भागमा हिउँ चितुवाको चित्र तथा त्यसको माथि ‘नेपाल राष्ट्र बैङ्क’ लेखिएको छ । नोटको तल्लो भागमा अंग्रेजी भाषामा ५० रुपैयाँ जनाउने शब्द तथा सन् २०२५ को शृङ्खला उल्लेख गरिएको छ ।
राष्ट्र बैङ्कले नयाँ नोटलाई साबिककै ५० रुपैयाँको नोटसरह कानुनी मान्यता रहने जनाएको छ । यसअघि २०७७ असार २२ गते जारी सूचनाअनुसार चलनचल्तीमा रहेका ५० रुपैयाँका नोट पनि यथावत् रूपमा प्रयोग गर्न सकिनेछन् ।
राष्ट्र बैङ्कले नयाँ नोट सार्वजनिक गर्नुको उद्देश्य सर्वसाधारणलाई नोटका विशेषताबारे जानकारी गराउनु रहेको जनाएको छ । नोटमा विभिन्न सुरक्षण विशेषता समावेश गरिएकाले नक्कली नोट नियन्त्रण तथा वास्तविक नोट पहिचानमा समेत सहयोग पुग्ने अपेक्षा गरेको राष्ट्र बैङ्कले जनाएको छ ।
