दोलखा । दोलखाको बिगु गाउँपालिकामा सवारी दुर्घटना हुँदा चार जनाको मृत्यु भएको छ । सो दुर्घटनामा वडा अध्यक्ष सहित १८ जना घाइते भएका छन् । गाउँपालिकाको वडा नम्बर ४ लादुकस्थित चार गोलाइमा प्रदेश नं ३–०१–२३ च ७५८० नम्बरको गाडी राति १० बजे दुर्घटना भएको थियो।
दुर्घटनामा विगु गाउँपालिका वडा नम्बर ३ वुलुङका ३५ वर्षीय विनोद केसी, ४५ वर्षीया अजिता खत्री र विगु गाउँपालिकाकै ५२ वर्षीया राधा खड्का र २४ वर्षीया चण्डीका थापाको मृत्युु भएको छ।
दुर्घटना परि वडा नम्बर ३ का वडा अध्यक्ष ४२ वर्षीय श्रीराम खड्का गम्भीर घाइते भएका छन् । उनलाई उपचारका लागि ट्रमा सेन्टर काठमाडौ लगिएको गाउँपालिका अध्यक्ष युधिष्ठिर खड्काले जानकारी दिए ।
दुर्घटनामा घाइते हुनेहरुमा विगु ३ बुलुङका ५५ वर्षीय चेत विक्रम खड्का, ६० वर्षीया चन्द्रकुमारी खड्का, १९ वर्षीया लक्ष्मी बढाथोकी, ४० वर्षीया लक्ष्मी बुढाथोकी, २९ वर्षीया सुस्मिता श्रेष्ठ रहेका छन्।
त्यसैगरी विगु ४ लादुकका ४० वर्षीया तुलकुमारी श्रेष्ठ, ५७ वर्षीया प्रितमदेवी कार्की, कविता खड्का, तुलकुमारी श्रेष्ठ, ११ वर्षीय शेरबहादुर श्रेष्ठ, २७ वर्षीया सविना खड्का, तीर्था कुमारी खड्का र कान्छी माया श्रेष्ठ घाइते भएका छन् ।
सिंगटीका १० महिने बालक केदार वली र बिगु गाउँपालिकाकै किशोर खड्का, उर्मिला खड्का र सलोम खड्का दुर्घटनामा घाइते भएको सशस्त्र प्रहरी बल, नेपाल गुल्म हेक्वा दोलखा नम्बर १८ गुल्मका प्रमुख, प्रहरी नायव उपरिक्षक बुद्धिनारायण महर्जनले जानकारी दिए।
उनका अनुसार घाइतेहरूको प्राथमिक स्वास्थ्य केन्द्र सिंगटी, रोल्वालीङ अस्पताल सिंगटी, दोलखा अस्पतालमा उपचार भइरहेको छ भने गम्भीर घाइतेहरुलाई काठमाडौं स्थित ट्रमा सेन्टरमा उपचारका लागि पठाइएको छ।
सिन्धुपाल्चोकको तातोपानीमा नुहाउन गएकाहरु घर फर्कने क्रममा गाउँ नजिकै सोमबार राति दुर्घटनामा परेको थियो। उद्धारका लागि नेपाल प्रहरी, सशस्त्र प्रहरी र नेपाली सेना राति नै घट्नास्थल पुगेका थिए।
सिंगल क्याविन भएको सामान ढुवानी गर्ने गाडीमा यात्रा गरेकाले बढि मानवीय क्षति भएको हुनसक्ने आँकलन गरिएको छ। मृतकहरुको सव राती नै चरिकोट स्थित चरिकोट अस्पतालमा ल्याईएको सशस्त्र प्रहरी बल, नेपाल गुल्म हेक्वा दोलखा नम्बर १८ गुल्मले जनाएको छ।
