Logo

सबैको चासो मोदीको नेपाल नीतिमा


रमेश घिमिरे (स्वतन्त्र पत्रकार)


रमेश घिमिरे (स्वतन्त्र पत्रकार)

विश्वकै सबभन्दा ठूलो लोकतन्त्र, गणतन्त्र भारतमा भएको १७ औँ लोकसभाको आम चुनावमा सत्तारुढ भारतीय जनता पार्टी (बीजेपी) पुनः दोस्रो पटक प्रचण्ड बहुमतका साथ विजयी भएको छ । लोकसभाको जम्मा ५४४ स्थानमध्ये ५४२ स्थानको लागि निर्वाचन भएको थियो । जसमा विजेपी एक्लैले ३०५ स्थान प्राप्त ग¥यो । जुन दुईतिहाइ बहुमतका लागि ५ सिटमात्र कम हो । बहुमतका लागि २७२ स्थान ल्याए पुग्छ । त्यस्तै विजेपीको नेतृत्वमा बनेको राष्ट्रिय लोकतान्त्रिक गठबन्धन (एनडीए) समेतको स्थान जोड्दा जम्मा ३५० स्थान हुन्छ । भारतीय लोकतन्त्रको इतिहासमा यति धेरै स्थान विरलै प्राप्त भएको छ । यो भन्दा पहिले भारतीय राष्ट्रिय कांग्रेसले भारतका प्रथम प्रधानमन्त्री जवाहरलाल नेहरु, इन्दिरा गान्धी र राजीव गान्धीको नेतृत्वमा यस्तो बहुमत प्राप्त गरेको थियो ।

बीजेपीले यो चुनाव प्रधानमन्त्री नरेन्द्र मोदीको नाममा लडेको थियो । चुनाव अभियानताका यस्तो लाग्दथ्यो यो चुनाव, संसदीय चुनाव नभएर राष्ट्रपतीय चुनाव हो । मोदीले सम्पूर्ण भारतको चुनाव अभियानको नेतृत्व गरे जुन आफैँमा एक कीर्तिमान हो ।

असी प्रतिशतभन्दा बढी हिन्दू धर्मावलम्बी भएको भारतको मूल संस्कृति, हिन्दू संस्कृतिको धरातलमा उभिएर उनी चुनाव अभियानमा होमिएका थिए । भारतका जनताले उनको त्यो अडानलाई रुचाएर पुनः दोस्रो कार्यकालका लागि प्रधानमन्त्री मोदीलाई प्रधानमन्त्रीको कुर्सीमा विराजमान गराइदिएका छन् ।

अब यहाँनेर के प्रश्न उठ्छ भने पहिलेभन्दा शक्तिशाली रुपमा प्रधानमन्त्री मोदीको पुनरागमनले नेपालमा कस्तो असर पर्ला त ? प्रधानमन्त्री मोदीले हिन्दूत्व र राष्ट्रवादको एजेन्डाले गर्दा विजय प्राप्त गरेका हुन् । सन्देश स्पष्ट छ प्रधानमन्त्री मोदीको कार्यदिशा यिनै एजेन्डाले निर्देशित गर्नेछन् ।

यता प्रधानमन्त्री केपी शर्मा ओलीलाई पनि नेपाली जनताले राष्ट्रिय हितका लागि कुनै सम्झौता नगरी दह्रोसँग उभिएको हुनाले नै प्रधानमन्त्री बनाएका हुन् । तर हालका दिनहरुमा नेपाली धर्म संस्कृतिविरुद्ध विदेशीहरुको जुन नांगो हस्तक्षेप चलिरहेको छ, यसमा नेपाल सरकार मूकदर्शक बनेर बसेकोमा नेपाली जनतामा भित्रभित्रै आक्रोश बढिरहेको छ । प्रधानमन्त्री ओलीले यस कुराको सम्बोधन गरेमा अवश्य पनि नेपाली जनता र प्रधानमन्त्री मोदीको विश्वास जित्न सफल हुनेछन् ।

नेपाली धर्म संस्कृतिमा पश्चिमा आक्रमण न त उत्तरी छिमेकी चीनले रुचाएको छ न त दक्षिणी छिमेकी भारतले नै । दुवै छिमेकीहरु यसलाई आफ्नो राष्ट्रिय सुरक्षामा खतरा मान्दछन् । आफ्नो पहिलो कार्यकालमा प्रधानमन्त्री मोदीले चार पटक नेपाल भ्रमण गरे । यो भारतीय प्रधानमन्त्रीको १७ वर्षपछि नेपाल भ्रमणको शुरुआत थियो । यसबाट के स्पष्ट हुन्छ भने नेपाल, प्रधानमन्त्री मोदीको उच्च प्राथमिकतामा छ र उनको पहिलो कार्यकालमा केही राम्रा कामहरु भएका छन् । जस्तै थन्केर बसेको नेपाल–भारत प्रबुद्ध समूह (इपिजी)को गठन, विद्युत् व्यापार सम्झौता, पेट्रोलियम पाइपलाइन आदि ।

प्रधानमन्त्री मोदीले नेपाललाई राम्रोसँग बुझ्ने नेता हुन् र उनले नेपाल–भारत सम्बन्धलाई कर्मचारीतन्त्रको घेराबाट राजनीतिक तहमा लैजान खोजेका छन् । नेपालले यसको सदुपयोग गरी स्पष्टसँग आफ्नो कुरा राख्नुपर्दछ । त्यसो त इपिजीले तयार पारेको प्रतिवेदन दुवै देशका प्रधानमन्त्रीले स्वीकार गरी सो अनुसार गरेमा नेपाल–भारत सम्बन्ध नयाँ उचाइमा पुग्नेछ । यसमा नेपालतर्फबाट अत्यधिक सक्रियता आवश्यक छ । प्रधानमन्त्री मोदीले इपिजीको प्रतिवेदनलाई कसरी लिन्छन् त्यसैमा आगामी दिनमा नेपाल–भारत सम्बन्ध कसरी बढ्दछ भन्ने कुराको छनक पाइनेछ ।

[email protected]

प्रतिक्रिया दिनुहोस्