काठमाडौं । ‘थाइ स्माइल एयरलाइन्स’ का प्रतिनिधिसँग घुस मागेको आरोपमा निलम्बनमा परेका त्रिभुवन अन्तर्राष्ट्रिय विमानस्थलका महाप्रबन्धक प्रेमनाथ ठाकुरमाथि थप अनुसन्धान गर्न संस्कृति तथा नागरिक उडायन मन्त्रालयले अख्तियार दुरुपयोग अनुरोध गरेको छ ।
संस्कृति, पर्यटन तथा नागरिक उड्ययन मन्त्रालयले गैरकानुनी लाभ लिने उद्देश्यले ‘थाइ स्माइल एयरलाइन्स’का प्रतिनिधिसँग कुराकानी गरेको पाइएपछि शुक्रबार ठाकुरलाई निलम्बन गरेको हो । त्यसलगत्तै मन्त्रालयले शुक्रबार नै थप अनुसन्धानका लागि आयोगलाई अनुरोध गरेको हो ।
मन्त्रालयको विज्ञप्तिमा भनिएको छ, ‘नेपाल नागरिक उड्डयन प्राधिकरण, त्रिभुवन अन्तर्राष्ट्रिय विमानस्थलका महाप्रबन्धक प्रेमनाथ ठाकुरले थाइ स्माइल एयरलाइन्सका प्रतिनिधिसँग गैरकानुनी लाभ लिने उद्देश्यले गरेको कुराकानीको श्रव्य सामग्री प्राप्त भएको हुँदा सो विषयमा जाँचबुझ गर्ने सिलसिलामा निजलाई पदबाट निलम्बन गर्न माननीय मन्त्री स्तरीय निर्णयअनुसार नेपाल नागरिक उड्डयन प्राधिकरणका महानिर्देशकलाई लेखी पठाइएको छ ।’
उक्त विषयमा थप अनुसन्धान गर्न अख्तियारलाई आयोगलाई अनुरोध गरी पठाइने निर्णय भएको प्रवक्ता राजेन्द्रकुमार केसीले जानकारी दिए ।
