काठमाडौं । मनोरञ्जनको क्षेत्र भन्ने वितिक्कै रेष्टुरेन्ट, डान्सबार, नाइट क्लब आदिलाई बुझ्ने गरिन्छ । यहाँ युवा–युवतीहरु रमाउन जाने गर्छन् । कुनै बेला महाजन वर्गको मात्र गन्तव्य मानिने ती ठाउँहरुमा अहिले आर्थिक स्थिती सामान्य भएकाहरुको पनि उपस्थिती बाक्लिँदै गएको छ ।
विदेशका चोकचोक, गल्लिहरुमा झैं नेपालमै पनि मनोरञ्जनका क्षेत्र जीवन्त संस्कृतिका रूपमा स्थापित भइसकेको छ । संसारभरमा जस्तै पछिल्लो समय काठमाडौंमा पनि मनोरञ्जन व्यवसाय फस्टाइरहेको छ । मनोरञ्जनका क्षेत्र जति फस्टाउँदै गएको छ, त्यति नै जघन्य अपराधका घटना पनि बढ्दै गएको छ ।
विदेशको जस्तो खुलापनलाई स्वागत गर्नु अस्वभाविक होइन । तर, यसले समस्या पनि निम्त्याइरहेको छ । नेपालमा जति खुला पश्चिमा संस्कृति मौलाउँदै गइरहेको छ, त्यति नै विकराल समस्याहरु पनि उत्पन्न भइरहेका छन् । बलात्कार जस्ता आपराधिक घटनाहरु दिनहुँ जसो बढिरहेका छन् ।
रमाइलो गर्न रेष्टुरेन्ट, डान्सबार, नाइट क्लब पुगेका महिला र किशोरीहरू तथा ती क्षेत्रमा काम गर्ने युवतीहरु असुरक्षित बन्नु अब सामान्य जस्तै भइसककेका छन् । पश्चिमा संस्कृतिले हाम्रो नयाँ पुस्तालाई चमकधमकसँग परिचित त गरायो । तर, अझैसम्म व्यवसायी, उपभोक्ता र समाजलाई उत्तरदायी बनाउन सकेको छैन् । फलतः मनोरञ्जनका क्षेत्रमा महिला तथा बालबालिकामाथि हुने यौन दुर्व्यवहार र हिंसाका घटना बढ्दो छ ।
निःसन्देह कसैको मन्जुरी बिना करकाव, डर, धम्की वा बल प्रयोग गरी जबरजस्ती गरिने यौन क्रिया बलात्कार हो । त्यतिमात्रै नभई बलात्कार व्यक्तिको स्वतन्त्र अस्तित्वलाई कब्जा गर्ने आपराधिक दुस्साहस पनि हो ।
कुनै महिलामाथि बलात्कार हुनुका थुप्रै कारणहरु हुन सक्दछन् । तर तिमध्ये मुख्य कारण महिलाको शरिरलाई वस्तुको रूपमा हेर्ने पितृसत्तात्मक सोच हो । महिलाको शरीरलाइ खेलौना तथा मनोरञ्जनको साधनको रूपमा हेर्ने पुरुषको नालायकी सोचको कारणले नै महिलामाथथि बलात्कारका घटनाहरु हुने गरेका छन् ।
पुरुषहरु वैदेशिक रोजगारीको लागि विदेश जानु, आर्थिक स्थिती कमजोर हुनु, स्कुल तथा कलेजमै व्वाईफ्रेन्ड र गर्लफ्रेन्ड संस्कृतीको विकास हुनु अनि विवाह नगरी सँगै बस्नु (लिभिङ टुगेदर) का कारणले पनि बलात्कारको घटना हुने गरेको छ ।
होटल, गेस्ट हाउस वा रात्रि क्लबजस्ता स्थल कानुनले निर्देशित, नियन्त्रित र सुरक्षित गरेका वैधानिक व्यवसाय हुन् । यस्ता ठाउँमा बालिगलाई निर्बाध प्रवेश दिइन्छ भने नाबालिगका लागि अभिभावकको उपस्थिति अनिवार्य गरिएको छ । कानुनको जानकारी र पालना कुनै स्वेच्छिक विषय होइन, अनिवार्य प्रबन्ध हुन् ।
तर, नाबालिगमाथि परपुरुषले यौन हिंसा गरेका पछिल्ला घटना विभिन्न होटल वा रात्रि क्लबमा भएका छन् । हालै मात्र नेपालकै सबैभन्दा चर्चित डान्स क्लबको परिचय बनाएको एलओडी (लर्ड अफ दि ड्रिङ्क्स) पुगेकी एक किशोरी बलात्कृत भएको घटनाले नेपाली समाजलाई फेरि तरंगित बनाएको छ ।
एलओडी क्लब पुगेकी ती १५ वर्षीया किशोरी ५० वर्षीय पुरुषबाट ललितपुरको बागडोलमा बलात्कृत भइन् । घटनाका आरोपित पक्राउ परेका छन् भने क्लबका दुई सञ्चालक पनि प्रहरी नियन्त्रणमा छन् ।
आरोपीत पक्राउ पर्नुमात्रै पनि ठूलो विषय होइन । बरु, मनोरञ्जन लिने र खुसी साट्ने ठाउँहरुमा नै अपराधका घटना किन बढिरहेका छन् ? हाम्रो समाजले यसको जवाफ खोज्नु आवश्यक छ ।
