ढुंगा प्रहार गरी एक पूर्वशिक्षकको हत्या

कैलाली । कञ्चनपुरमा एक पूर्वशिक्षकको हत्या भएको छ । जिल्लाको बेलौरी नगरपालिका–६ को विद्यानगरका पूर्वशिक्षक लछी चन्दको ढुंगा प्रहार गरेर हत्या भएको प्रहरीले जनाएको हो ।

चन्दको हत्या गरेको आरोपमा बेलौरीकै ३५ वर्षीय महेश भण्डारीलाई आज पक्राउ गरिएको जिल्ला प्रहरी कार्यालयका प्रवक्ता प्रहरी नायव उपरीक्षक (डीएसपी) उमेश जोशीले जानकारी दिए ।

उनका अनुसार मादक पदार्थ सेवनका क्रममा विवाद भएपछि भण्डारीले ढुंगा प्रहार गरी चन्दको हत्या गरेको खुलेको छ । भण्डारीलाई नियन्त्रणमा लिएर अनुसन्धान भइरहेको प्रहरीले जनाएको छ ।