काठमाडौं । काठमाडौंको कागेश्वरी मनहरा नगरपालिका–५, थलीमा शंकास्पद अवस्थामा मृत भेटिएका पुरूषको पहिचान खुलेको छ ।
मृतक पुरूष चाँगुनारायण नगरपालिका वडा नम्बर ५ छालिङका कृष्ण नगरकोटी भएको प्रहरी वृत्त बौद्धले जानकारी दिएको छ । उनको साथमा रहेको सवारी चालक अनुमति पत्रका आधारमा पहिचान खुलेको हो ।
नगरकोटी आज बिहान साढे पाँच बजेतिर मृत अवस्थामा भेटिएका थिए । उनको शव मुलपानीबाट थलीतर्फ जाने सडकको बायाँतर्फको निर्माणाधीन पर्खालमा फेला परेको थियो ।
कपडाले मुख ढाकेको र रगत बगिरहेको अवस्थामा फेला परेको शव नजिकै दुईवटा ब्लेडसमेत फेला परेको थली प्रहरीले जनाएको छ । प्रहरीका अनुसार मृतक नगरकोटीको घाँटी काटिएको पाइएको र घटनाबारे अनुसन्धान भइरहेको छ ।
