काठमाडौं । कान्तिपुर प्रकाशक कैलाश सिरोहियाको गिरफ्तारीको जिम्मेवारी प्रधानमन्त्री पुष्पकमल दाहाल प्रचण्डले लिएका छन् । प्रमुख सञ्चारगृहका सम्पादकहरुले लेखेको संयुक्त पत्र बुझ्दै बुधबार अपराह्न प्रचण्डले अदालतको आदेश पालना गर्दै सिरोहियालाई समात्न प्रहरीलाई निर्देशन दिएको बताए ।
‘हिजो बिहानसम्म पनि म कैलाशजीलाई समाउने बेला भएको छैन, त्यसो नगरौं भन्नेमा नै थिएँ’, सम्पादकहरुको पत्र लिएर बालुवाटार पुगेको प्रतिनिधिको समुहलाई भेट्दै प्रधानमन्त्रीले भने, ‘तर अदालतले नै पक्राउ गर्न आदेश दिइसकेको अवस्थामा मैले त्यसो नगरौं भन्ने अवस्था भएन । त्यसैले कैलाशजीको पक्राउसम्बन्धी मैले जिम्मेवारी लिनुपर्छ, लिन्छु ।’
बाह्रखरी डटकमका सम्पादक प्रतीक प्रधानले भने, ‘उहाँ (प्रधानमन्त्री)ले हाम्रो पत्रलाई सकारात्मक रुपमा लिएको सुनाउनुभयो, अदालतको आदेश आइसकेपछि त्यसलाई कार्यान्वयन गर्नु सरकारको दायित्व भएको भन्नुभयो’, पत्र बुझाउन बालुवाटार गएका ‘कैलाशजी आवश्यक कानुनी प्रक्रियापछि छुट्नुहोला भन्ने आशा छ भन्नुभएको छ ।’
३१ सम्पादकहरुले बुधबार प्रधानमन्त्रीलाई लेखेको संयुक्त पत्र बुझ्दै प्रधानमन्त्रीले प्रेससँग अनावश्यक झमेला सिर्जना गर्ने वा दूरी बढाउने पक्षमा सरकार नरहेको बताएका थिए ।
उनले पत्रमा व्यक्त भावलाई गम्भीर रुपमा लिएको भन्दै सकारात्मक पहलको आश्वासन दिए । बुधबार बिहान प्रधानमन्त्री प्रचण्डले सिरोहिया निर्दोष भए रिहा हुने प्रतिक्रिया दिएका थिए ।
