काठमाडौं । काठमाडौं महानगरपालिकाको ४३औँ कार्यपालिका बैठक प्रमुख बालेन्द्र शाहको अध्यक्षतामा सम्पन्न भएको छ। बैठकले विभिन्न १४ विभागीय प्रस्तावसहित कुल १५ प्रस्ताव पारित गरेको हो।
प्रशासन विभागतर्फबाट कलंकी र डिल्लीबजार मालपोत कार्यालयलाई क्रमशः १० लाख र १५ लाख रुपैयाँ अनुदान दिने निर्णय गरियो। सामाजिक विकास विभाग अन्तर्गत बालकल्याण अधिकारी तोक्ने, सीप तथा तालिम परिषद् स्थापना कार्यविधि तर्जुमा गर्न सैद्धान्तिक सहमति दिने प्रस्तावहरू पारित भए।
वडा नं ५ टंगाल, वडा नं १ दरबारमार्ग र नक्सालमा व्यावसायिक तथा संस्थागत भवन निर्माणसम्बन्धी प्रस्तावहरू स्वीकृत गरिए। सिटिनेटद्वारा इन्डोनेसियामा आयोजना हुने बैठकमा सहभागी हुन वडा नं १६ की वडाध्यक्ष रोजिना श्रेष्ठको मनोनयन पनि पारित भयो ।
सहरी योजना आयोगका सदस्यमा सुरज शाक्य र सुमन प्रधान नियुक्त गरिए । कानुन तथा मानवअधिकार विभागले तयार पारेको राष्ट्रिय सभागृह सञ्चालन निर्देशिका, २०८२ स्वीकृत गरियो। सूचना प्रविधि विभागतर्फ सफ्टवेयर विकास तथा सञ्चालन केन्द्र स्थापनाका लागि आवश्यक जनशक्ति व्यवस्थापनसम्बन्धी प्रस्ताव पारित गरियो ।
पार्क, डबली तथा दरबार क्षेत्रको मर्मत कार्यका बाँकी कामको स्थानान्तरण गर्ने निर्णय र ३५ गाउँपालिकालाई एम्बुलेन्स खरिदका लागि प्रतिपालिकाबाट प्रतिगाउँपालिका २२ लाख ९९ हजार रुपैयाँ अनुदान दिने निर्णय पनि गरियो। यस्तै, उपकरण महाशाखाका कर्मचारीलाई वार्षिक एप्रोन सुविधा बढाएर १ हजार रुपैयाँ दिने निर्णय भएको छ ।
स्वास्थ्य विभागतर्फ नेपाल एम्बुलेन्स सेवासँगको सम्झौता नवीकरण गर्ने र स्वास्थ्य बीमा लागू भएका १० स्वास्थ्य केन्द्रमा मेडिकल अधिकृत, ल्याब टेक्निसियन र कार्यालय सहयोगीको व्यवस्था गर्ने निर्णय गरियो ।
बैठकमा केही वडाध्यक्षहरूले भदौ २४ गते सिंहदरबारमा लागेको आगो निभाउन महानगरको दमकल कहाँ थियो भन्ने प्रश्न उठाए। विपद् व्यवस्थापन महाशाखा प्रमुख विष्णुप्रसाद जोशीले उक्त दिन साँझ ८:१५ बजे सिंहदरबार प्रवेश गरेर आगो नियन्त्रणमा ल्याउन प्रयास गरिएको जानकारी दिए।
