काठमाडौं । माधव कुमार नेपालले नेपाली कम्युनिष्ट पार्टीमा एकीकृत हुनु अघि नै महासचिव घनश्याम भुसालसहित ६ नेतालाई कारबाही गरेको खुलेको छ ।
बुधवार भएको १० दलको राष्ट्रिय एकता सम्मेलन हुनुभन्दा अघि नै नेपालले महासचिव भुसाल, रामकुमारी झाँक्री, दामोदर अर्याल, नन्दलाल बन्जाडे, धर्मराज निरौला र कृष्ण कुमार श्रेष्ठलाई पार्टी सदस्य समेत नरहनेगरी कारबाही गरेको खुलेको हो । साथै अध्यक्ष नेपालले कारबाहीमा परेका नेताहरूले पार्टीको नाम र पदको दुरुपयोग गरेर भेला, बैठक, पत्रकार सम्मेलन वा कुनै पनि गतिबिधि गरेमा कारबाही हुने चेतावनी समेत दिएका छन् ।
एकीकृत समाजवादीसहित १० बाम दलले नेपाली कम्युनिष्ट पार्टी गठन गरिसकेका छन् । एकता प्रक्रियामा असन्तुष्टि जनाउँदै रामकुमारी झाँक्री र किसान श्रेष्ठ एमालेमै फर्किने तयारीमा छन् भने भुसालले भने पार्टीलाई पुनर्गठन गर्ने भन्दै भेला बोलाएका छन् । यस अघि असन्तुष्ट रहेका नेता झलनाथ खनाल भने अन्तिम समयमा एकता प्रक्रियामा सहभागी भएका थिए ।
