समकालीन सात कविका यतैकतै बजारमा « Drishti News – Nepalese News Portal
Logo

समकालीन सात कविका यतैकतै बजारमा


- दृष्टि न्युज/संवाददाता


काठमाडौं, १३ असोज । समकालीन सात कविका संयुक्त कविता संग्रह ‘यतै कतै’ बजारमा आएको छ । संग्रहमा कविहरु आरएम डंगोल, गोविन्द नेपाल, छविरमण सिलवाल, टंक उप्रेती, ठाकुर वेल्वासे, प्रोल्लास सिन्धुलीय र मणि लोहनीका ७० वटा कविता समेटिएको छ ।

आ–आफ्नो क्षेत्रमा स्थापित सातै कविहरु नेपाली कविताको शक्ति, सौन्दर्य र गाम्भीर्यप्रति सचेत देखिन्छन् । उनीहरुका कवितामा देशको पछिल्लो तस्वीर मात्र होइन यो पुस्ताले भोगेको त्रासदीपूर्ण जीवन र सम्भावनाको अनन्त उज्यालो पढ्न सकिन्छ । द्वन्द्वको घाउ र राजनीतिक पटाक्षेपसँगै मानिसको बाँच्ने चाहना र त्यसका लागि गरिने संघर्ष कवितामा अनुभूत हुन्छ ।

विषम परिस्थिति र विसंगत समयमाथि लेखिएका अब्बल कविताहरुले नेपाली कविताका पारखीहरुलाई सन्तुष्ट पार्ने प्रकाशकको विश्वास छ । समवयी सिर्जना कौशलसहित चालीसदेखि पचासको दशकसम्ममा स्थापित सर्जकहरुको काव्यिक सोचको एकमुष्ट साक्षीको रुपमा ‘यतै कतै’ कृतिको प्रकाशन गरेको विएन पुस्तक संसार प्रालिका प्रमुख सूर्य बिसीले जनाएका छन् । कितावको मूल्य तीन सय रुपैयाँ तोकिएको छ ।

कविताको क्षेत्रमा स्थापित यी सात कविहरुले ‘पी सेभेन’ समूह गठन गरी कविताको अध्ययन, अनुसन्धान र अनुवादका कामहरु गर्ने जनाएका छन् ।

प्रतिक्रिया दिनुहोस्