१६ पुस, काठमाडौं । स्वास्थ्य तथा जनसंख्यामन्त्री डा. सुधा गौतमले सरकारले मानसिक स्वास्थ्यसम्बन्धी छुट्टै नीति तयार गर्ने तयारी थालेको बताएकी छन् ।
स्वास्थ्य पत्रकार मञ्च नेपालले आयोजना गरेको अन्तरक्रियामा उनले हालसम्म मानसिक स्वास्थ्यका लागि अलग नीति नभएको र पुरानो स्वास्थ्य नीतिको संशोधनमा समावेश गर्नेभन्दा छुट्टै नीति प्राथमिकता दिएको जानकारी दिइन् ।
मन्त्री गौतमले सर्वोच्च अदालतको निर्णय अनुसार मानसिक स्वास्थ्य सेवा विस्तारका लागि महाशाखा गठन गर्ने सरकारको प्रतिबद्धता रहेको र कार्यक्रम प्रभावकारी रूपमा सञ्चालन गर्न समय अनुसार तयारी अघि बढाइने बताइन् ।
उनले भनिन्, “महाशाखा संरचनात्मक रूपमा मात्र बनाएर काम गर्नु पर्याप्त छैन। प्रभावकारी रूपमा कार्यक्रम अगाडि बढाउने हाम्रो प्राथमिकता हो।”
