काठमाडौं । नेपालको प्रजातान्त्रिक आन्दोलनका योद्धा, नेपाल पत्रकार महासङ्घका पूर्वसभापति एवम् पूर्व मन्त्री होमनाथ दाहालको गएराति निधन भएको छ । घुँडासम्बन्धी समस्याबाट पीडित दाहालको ८४ वर्षको उमेरमा निधन भएको हो ।
काठमाडौंको मैतीदेवी निवासमा दाहाललाई हृदयाघात भएपछि उपचारका लागि वीर अस्पताल लगिएको थियो । उनको आजै पशुपति आर्यघाटमा अन्तिम संस्कार गरिने वरिष्ठ पत्रकार पुरुषोत्तम दाहालले जानकारी दिए ।
१९९८ साल कात्तिक २५ गते ओखलढुङ्गाको साविक वरुणेश्वर गाउँ विकास समिति–३, रामपुरमा जन्मिएका दाहालले नेपाली कांग्रेस ओखलढुङ्गाको जिल्ला सदस्य तथा तत्कालीन नेपाली कांग्रेस (प्रजातान्त्रिक)को केन्द्रीय सदस्यसमेत भएर जिम्मेवारी सम्हालेका थिए।
२०५६ सालमा ओखलढुङ्गा क्षेत्र नम्बर–१ बाट सांसद निर्वाचित भएपछि २०६१ सालमा कृषि तथा सहकारी मन्त्री बनेका थिए । गोरखापत्र संस्थानका पूर्वअध्यक्ष तथा महाप्रबन्धक पत्रकार दाहालले नेपाली पत्रकारिता क्षेत्रमा विशिष्ट योगदान पुर्याएका छन् । उनका श्रीमती अनि दुई छोरा छन् ।
