काठमाडौं । ‘प्रगतिशील लोकतन्त्र, उन्नतिशील राष्ट्र’ नारासहित प्रगतिशील लोकतान्त्रिक पार्टी (प्रलोपा) ले फागुन २१ गते हुने प्रतिनिधिसभा सदस्य निर्वाचनका लागि आफ्नो प्रतिबद्धतापत्र सार्वजनिक गरेको छ।
आज आयोजित पत्रकार सम्मेलनमार्फत पार्टी अध्यक्ष दुर्गा सोब, अध्यक्ष सन्तोष परियार लगायतका नेताहरूले संयुक्त रूपमा प्रतिबद्धतापत्र सार्वजनिक गरेका हुन्। कार्यक्रममा बोल्दै सुदन किराँती सहितका नेताहरूले मुलुक चरम आर्थिक संकट, राजनीतिक दल र नेतृत्वको तीव्र भ्रष्टीकरण तथा कुशासनका कारण गम्भीर परिस्थितिमा पुगेको बताएका थिए।
गत भदौ २३–२४ मा भएको ‘जेनजी विद्रोह’ ले नेपाली समाजलाई जरैदेखि हल्लाएको उल्लेख गर्दै नेताहरूले उक्त आन्दोलनकै बलमा चुनावी अन्तरिम सरकार गठन, संसद् विघटन तथा फागुन २१ गते प्रतिनिधिसभा निर्वाचन हुन लागेको बताए।
उनीहरूका अनुसार आगामी निर्वाचनमार्फत अग्रगामी वैकल्पिक शक्तिको सार्थक पहल सम्भव भए मुलुकको राजनीतिक पुनर्संरचनासहित सुशासन र समृद्धिको ढोका खुल्ने विश्वास व्यक्त गरिएको छ।
पार्टीका केन्द्रीय सदस्य तथा भक्तपुर–२ का प्रत्यक्ष उम्मेदवार जन्मदेव जैसी का अनुसार संविधान व्यवहारतः पूर्ण रूपमा कार्यान्वयन नहुँदा पूरा हुन नसकेका जनआकांक्षा तथा जेनजी र नेपाल सरकारबीच भएको १० बुँदे सम्झौता कार्यान्वयनका लागि यो निर्वाचन कोसेढुंगा सावित हुनेछ।
प्रलोपाले परिवर्तनका विभिन्न आन्दोलनमा सहादत प्राप्त गरेका ज्ञात–अज्ञात शहीदहरूको सपना पूरा गर्ने अठोट व्यक्त गर्दै निर्वाचनमा उत्साहपूर्ण सहभागिताका लागि आम जनसमुदायलाई अपिल गरेको छ।
अन्य दलभन्दा आफूहरू फरक रहेको दाबी गर्दै प्रलोपा नेतृत्वले हाल अभ्यासमा रहेको लोकतन्त्रले जनतालाई पाँच वर्षमा एक पटक मतदान गर्ने अधिकारमा मात्र सीमित गरेको आरोप लगाएको छ। लोकतन्त्रका नाममा दलतन्त्र, गुटतन्त्र र नेतातन्त्र मौलाएको जनगुनासो बढिरहेको उल्लेख गर्दै पार्टीले ‘प्रगतिशील लोकतन्त्र’ को अवधारणा अघि सारेको जनाएको छ।
पार्टीका अनुसार उक्त अवधारणाको मूल आधार पूर्ण समावेशीता, सामाजिक न्याय र समता, जनसहभागितामूलक शासन, आर्थिक तथा सांस्कृतिक अधिकारको सुनिश्चितता, सुशासन तथा पारदर्शितामा आधारित हुनेछ।
प्रलोपा नेतृत्वले पुराना दलहरू वर्तमान समस्याको समाधान र भविष्यका सम्भावनाको यथार्थ मूल्यांकन गर्न असफल भएको आरोप लगाउँदै आफूहरूसँग मुलुकलाई समृद्ध बनाउने स्पष्ट दृष्टिकोण, वैचारिक स्पष्टता, युवा तथा दूरदर्शी नेतृत्व, ठोस योजना र कार्यक्रम रहेको दाबी गरेको छ।
